Ua iai se isi fesoasoani ua ofo mai e le Malo tele o Amerika mo puipuiga o le saogalemu o ogasami o Samoa.
O le faaiuga o le vaiaso na sainia ai se maliega i le va o malo e lua e pei ona fai ai le Alii Palemia o Samoa, le Susuga Tuilaepa Lupesoliai Sailele Maliegaoi ma le Alii Amepasa o Amerika i Niu Sila ma Amerika, o David Huebner i lea sainigalima na faatautaia i luga o le Manuao o le Fuavaatau a Amerika o le USS Chafee – o se tasi o Manuao e lua a Amerika o loo i Samoa i le faamanatu ai o le 50 tausaga o le Tutoatasi o le atunuu.
Faaalia e lea maliega na sainia o lenei feagaiga ua faamautu ai le faaleleia atili o le tamaoaiga o Samoa aemaise o se tali atu i le puipuiga o ogasami o le atunuu ma ua saga faamausali ai le va galulue faatasi o Samoa atoa ai ma Amerika.
O le uiga o lenei maliega, o le a mafai ai ona faaaogā e sui o le Malo o Samoa nei a latou galuega mai i luga o vaa leoleo a Amerika o loo feoai i le Pasefika mo leoleoga.
O a lava la mataupu e moomia ai le leo o sui o le Malo o Samoa i luga o le sami, e mafai ona faatino i le faaaogā ai o nei vaa leoleo a lea malo. E mafai foi ona faaaogā e Samoa vaa nei aua le sailiga o i latou e solitulafono ma ua masalomia le iai i ogasami o Samoa.
E le gata i vaa fagota o loo fagotaina ogasami o Samoa e aunoa ma se faatagaga ae e faapea foi ia i latou e masalomia le aumai o aupega poo fualaau faasāina i o latou vaa ma ua maua i totonu o ogasami o le atunuu.
O se suiga tele lenei auā o le tele lava o vaa fagota o Samoa e maua i ogasami o Amerika Samoa o vaa leoleo lava nei o Amerika e tele ina maua nei vaa fagota ma e feololo foi le numera o vaa fagota na maua ma faasala ai e Amerika Samoa ona o ia asiasiga ma leoleoga.
O sui o le malo o Samoa e mafai ona galulue faatasi ma vaa leoleo nei o Amerika ua aofia ai sui o le Matagaluega o Leoleo ma Falepuipui ma sui o le Ofisa o Faatoaga ma Faigafaiva.
O lenei maliega o se tasi lea o fesoasoani ua faamautu i le malaga mai ai o nei Manuao o le fuavaatau a Amerika mo le Fu‘a o Samoa.
E le gata i lea o le aumalaga aloaia a le Malo tele lea e talimalo ai Samoa i le tutoatasi. O le toatele lava o sui o le Fuavaatau a lea atunuu sei vagana ai le afioga i le Amepasa le Susuga David Heubner atoa ai ma le Afioga Faleomavaega Eni Hunkin le sui o Amerika Samoa i le Konekeresi a Amerika.
O le vaiaso foi na tea nei lea na faamautu ai fuafuaga faataatitia aua le galuega ua faatupe e Amerika mo le falemai lea o le a fausia i Faleolo faafesagai ma le Malaevaalele faavaomalo i lea vaega o le atunuu.
O manuao nei e lua na malaga mai ai le faaili a le Navy a lea atunuu atoa ai ma se ausiva ua ta‘ua o le Step Afrika lea e faafiafia solo i aoga ma aulotu i totonu o Samoa. O Amerika ma Amerika Samoa o le a talimalo i le mafutaga faalemalo mulimuli lava o le Sisigafu‘a lea e faatautaia i Vailima i le po o le Aso Lua o le vaiaso lenei ma faaiu atu ai lava fiafia o le Tutoatasi o Samoa. E fou nei le faalautele ai o le va galulue faatasi lenei o Samoa ma Amerika – e ui ua tele tausaga o iai le fesootaiga, ae o le itu tau i atina‘e o Samoa o lea lava ua vaaia le faaopoopo o le fesoasoani mai i lea foi malo tele.
Ua fetaui foi la le iai o lea aumalaga tele mai i Amerika i Samoa ua taulai sa‘o lava i ai o nisi o faitioga ma fanoga a le afioaga o Satapuala, lea e finau lava o o latou fanua ia ua fuafua le malo o Amerika ma le malo o Samoa latou te fausia ai le falemai i lea itu o Upolu.
O le vaiaso na tea nei i se latou tetee filemu, na talosaga ai taitai o le afioaga o Satapuala mo se taui mai i le Malo o Amerika e faatatau i le tele o maligi na faapea ona nonofo faavaitaimi ma tamaitai o le afioaga mae‘a le taua ae toe sosola i Amerika.
Faaalia e Leao Akeripa Toalepaialii le sui o le afioaga, o uiga lē lelei nei na faia e maligi o Amerika na tulai mai ai foi le tele o faafitauli i aiga aemaise o tamaitai Samoa na maua ai fanau i nei tagata ma o le taimi lea na tumutumu ai le Maligi a Amerika aua puipuiga o le Pasefika i lea itu a o faato‘ā fausia ai ma le malaevaalele i lea afioaga.
O le aotelega o lea tetee na fapea ona talosaga ai Satapuala i atunuu sa pulea faakolone Samoa, Niu Sila ma Siamani e toe silasila i faaiuga ua ave ai e le Malo o Samoa o latou fanua pe le mafai ona iai se suiga i faaiuga faaauau a le faamasinoga ua fai iai, ona o lo latou manatu na ave faagaoi fanua o le afioaga e faigamalo ia ua ta‘ua ma ua faapea ai ona finauina pea lenei mataupu e oo mai i lenei vaitaimi.
O fanua nei ua i lalo o le vaaiga a le Esetete Tausi ma ua faamautu mai pea e le Faamasinoga, o fanua nei o fanua faalemalo – ua mae‘a foi fesuiaiga o fanua ma tagata o Satapuala.
