Ua lauiloa le afioga Asuao Lealaitagomoa Felise Mikaele i lana taleni o le pese ma le tusia o pese Samoa faapea nisi o pese i le gagana peretania. Peitai o tausaga e tele o le atina‘e o le musika a lea tamalii poo se tamafanau a Samoa, e lē o ‘asa lava ma faaletonu.
O le faaletonu pito matuia ma ogaoga o le faaaogā faagaoi poo le faaaogā faasolitulafono e nisi e aunoa ma le usitaia o aiaiga o le Tulafono o loo puipuia ai tomai tau fatuga le Copyright Law.
O le pese o le “Tama a Samoa” lea o loo iai viiviiga o le aulakapi a le atunuu o le Manu Samoa, ua faaaogā faagaoi e le kamupani o le MCCANN World Group ma le Master Card. Ua faamaonia lea gaioiga ina ua mae‘a se feutanaiga a loia a le susuga i le alii pese ma loia a lea kamupani i Ausetalia. “E ui lava ina faigofie le finauga ona sa ioe le kamupani a MC CANN i lo latou solia o le tulafono o Copyright, ae sa tulai mai foi a latou loia, o Nicholas Pullen ma Andrew Thompson ma tuuaia le feseaiga o le Apra/Amcos lea e lesitala ai le copyright o le pese “Tama a Samoa” ma MC CANN, o se mafuaaga ua soli ai e MC CANN le tulafono.
O se mafuaaga ia ou tilotilo i ai atoa ma le taofia o faasalalauga i luga o TV mai le taimi sa taofi atu ai faaletulafono e la‘u loia o Karen Soich, ia fua i ai se tupe latou te totogia. Lea ua malilie nei itu e lua o Felise Mikaele ma MC CANN ma le MASTERCARD i se tupe e lē faailoaina faalauaitele ona o se maliega ua sainia e Felise Mikaele ma MC CANN WORLDGROUP, latou te totogia foi le loia a Felise o Karen Soich, toe faaauauina o faasalalauga i luga o Televise se‘i oo i le aso 23 o Oketopa”.
O le faamatalaga lea mai le alii pese i sona finagalo tusitusia na tuuina mai ina ua maua faamatalaga o loo malaga i Sini i Ausetalia e soalaupule le mataupu.
Fai mai le alii pese e lē o le taimi muamua lenei ua faagaoi ai ona faaaogā nisi o ana pese e isi tagata.
“O le faalima ai lenei ona suesueina i luma o le tulafono o copyright, le pese lava lenei “Tama a Samoa”.
O le tausaga muamua o le 1994 ina ua pue faalesolitulafono e se faili Samoa, a o loia le Afioga ia Aeau Semi Epati.
O le 1995 sa pue ai e se alii pese Hawaii ma se aufaipese a tamaitai Samoa i Amerika, a o 1996 sa pue ai e se alii pese mai Tonga e aumau i Aukilani, ma sa ioeina uma e i latou lo latou solia o le tulafono o Copyright”.
O loo iai se isi gaioiga faapea o loo suesueina nei foi ma e aafia ai se pisinisi i Samoa e iai sona vaega o loo faagaioia i Aukilani i Niu Sila. O loo taofia le faalauaiteleina o faamatalaga i lea suesuega ona o pese foi a Asuao Felise ua faaaogā e aunoa ma le tapa muamua o se ioega poo se faatanaga.
