E toatasi se tina maitaga na maua i le swine flu ua uma ona faia se taotoga i le valu masina o le maitaga ma aveesea ai lana pepe ona sa faaalia mai e se molimau faatuatuaina i le Matagaluega o le soifua maloloina sa tele le tulaga lamatia o le soifua o le tina ona sa tigaina i auga o le swine flu. Peitai na lelei le vaaiga e fomai ma le au tausi soifua ma vave ai loa ona faia le taotoga e faasaoina ai le ola o le pepe fou ma le soifua o le tina. O le pepesi o le faamai i Samoa ua taua mai ai foi e toafa nisi tina maitaga ua aafia i auga o le swine flu, le fulu o meaituaolo poo le H1N1 influenza, o loo mataitu nei e le matagaluega o le soifua maloloina lo latou aafiaga i le gasegase. E le o iai se tulaga faaletonu o faapopoleina ai le saogalemu o ia tina maitaga, sei vagana le taumafai e vaai lelei o latou auga ina nei afaina ai o latou soifua aemaise o pepe e lei fananau mai.
O loo faigata ona maua faauluuluga o le matagaluega mo le tuuina mai o se faamatalaga tonu i le tulaga o iai tina maitaga ua aafia i auga o le faamai fulu ua pepesi, seia vagana se pepa o faamatalaga na tuuina mai ua taua ai se nofoaga faapitoa mo le vaaia o tina maitaga ua aafia i auga o le swine flu, lea ua faaaoga ai le faleaoga o alii ma tamaitai tausi soifua o loo faafesagai ma le falemai faamama toto i Motootua. O le atunuu tuaoi o Tonga e toatasi se tina maitaga ua maliu ona o le swine flu, ae sa faia se taotoga ma faasaoina ai le ola o lana pepe. O popolega ia o loo ufitia ai nisi o tina maitaga i Samoa ina nei afaina se soifua o i latou pe a faatamala le vaaiga mai le swine flu. Peitai o fautuaga faalesoifua maloloina o loo lapataia ai pea le atunuu lautele i gaioiga uma e tatau ona faia mo le puipuia o le soifua.
O le taimi nei ua oo atu le aofaiga o tagata i Samoa ua aafia i le swine flu i le 90, ae iai le talitonuga ua sili atu le aofaiga ona o nisi tagata ua aafia e le o mafai ona agai ane i falemai mo le vaaia o se fomai, ae o loo faaaoga lava nisi o togafitiga masani e pei o le faamalolo lelei o le tino ma inu fualaau tui o le amoxil ma fualaau o tino gagase ma tiga o panadols. O fanauiti ua aafia o loo fulisia i tamaiti mai le 4 i le 14 tausaga le matutua ma o le isi lea pogai o le taofia faaumiumi o aoga i le atunuu lea ua lua nei vaiaso o taofia, ae ua taua e le matagaluega o le soifua maloloina poo le aso 11 o Aukuso e tatau ona toe a‘e uma ai. Ua faia lea faaiuga ona ua molimauina le pau o le numera o fanau e sulufai atu mo ni togafitiga faafomai, ma o le isi lea itu lelei i le tapuni o aoga ua taofiofi ai le pepesi o le swine flu faapea ma le fulu masani.
E 33 ni gasegase o le swine flu sa taofia i se vaega faapitoa o le falemai tele o Tupua Tamasese Meaole mo togafitiga, ua tetea le toa sefulu ua malolosi ae o loo taofia pea le isi 23. O se isi lea vaega o taumafaiga a le matagaluega o le falemai mo le taofiofia o le pepesi o le faamai, o le ave o tagata ua faamaonia ua aafia i le nofoaga faapitoa ua saunia. Talu ona amata sosolo le faamai sa matua siitia maualuga le numera o tagata e lipoti atu i le falemai o Tupua Tamasese Meaole faapea le nofoaga faapitoa i le eleele fou, ae peitai ua iai nai suiga ua vaaia i le amata ona pau le numera o tagata e agai mo le vaaia o se fomai ona o auga o le fulu masani. O loo talosia e le Matagaluega ia faatumauina pea le saogalemu o soifua o le atunuu e leai se isi e maliu mai le swine flu, pe a usitaia lapataiga ma fautuaga. O loo avea ma vaaiga taulai i galuega fesoasoani ma togafitiga o le fulu puaa le fulu na pepesi ma aafia ai le soifua o le faitau afe ma afe o tagata Samoa i tausaga e tele ua mavae a o pulea Samoa e le Malo o Niu Sila.
