Ua toe o se aga ona faataunuuina loa lea o le faamoemoe ua leva ona tuupoina, mo le sailia o se Tausala, poo le Miss Samoa NZ mo lenei foi tausaga, 2012.
I se pepa o faamatalaga na tuuina mai e le pulega, o loo taua ai le maua pea o le avanoa a o toeitiiti ona faamutaina loa lea, ina ia faaulu atu ai ni tamaitai Samoa mo lenei tausinioga.
O tamaitai uma o loo agavaa mo lenei tauvaga, e tatau ona i le va o le 17 i le 24 tausaga le matutua, ma o ni tamaitai e lei faia ni o latou aiga (Single).
E matagofie faailoga poo ni faamanuiaga o le a maua e le tamaitai o le a manumalo mai le tauvaga o lenei tausaga.
E le gata ina faapaleina i le pale o le Tausala Samoa Niu Sila, ae o le a agavaa ai foi e tauva i le tauvaga o le Miss World NZ, ma le Miss World Samoa, lea o le a faia lena tauvaga (Miss World Samoa) i le atunuu lava i Samoa.
O lona tauaveina foi o le pale o le Miss Samoa Niu Sila, o le a faatino ai ona tofiga o se amepasa Samoa, e le gata i totonu o komiuniti a Samoa i Niu Sila, ae faasolo atu foi i le atunuu i Samoa, ma le tele o isi meafai a tagata Samoa i Niu Sila o le a taulamua ai lava o ia, faapea foi ma ni faigamalaga e ono auai atu ai.
O se avanoa lelei mo soo se tamaitai talavou (single) Samoa e tofo ai i lenei vaega taua o le soifuaga mo soo se tamaitai Samoa, a o maua le avanoa.
O faamatalaga uma mo le faamautuina o se avanoa i lenei tauvaga ua le o toe mamao, e mafai ona maua uma i le imeli: info@misssamoanzpageant.co.nz, poo le fesootai i le telefoni feaveai: 021 648 637.
