E iai gagana tautala o aso uma e faaauau pea ona faaaogāina, ae o nisi foi o gagana tautala e mo na o ni vaitaimi. O se tasi o gagana e pei ona masani ai e faapea, “O aoga e mo fanau,” peitai atonu e mafai ona faapea se manatu o la tatou auaunaga, ua iai suiga i o tatou augatupulaga.
O loo maitauina le toatele o tagata matutua o si o tatou atunuu o taupati e toe a‘oa‘oina le soifua ma faalautele le malamalama i le tele o mataupu eseese e aofia ai ma le gagana Peretania poo le Igilisi faapea le Komepiuta.
O le Aso Lua na tuanai atu na tatala aloaia ai se tasi o aoga afiafi i le pitonuu o Broadmeadows i le aai o Melepone, mo le faamoemoe lava lea e tasi. E tolu pe fā vaiaso na faagasolo ai le resitala mo le aoga, ma e luasefulu ma le ono le paia ma le mamalu ua amataina nei le faamoemoe. O le ‘afa o lea aofai o tagata matutua, o se fiafiaga sili lea i le susuga ia Ronnie Logova o le Universal Institute of Technology ma Maria Tuua o le Tagiilima Unilink lea ua vaavaalua nei e faatino lenei tautua mo nai o tatou tagata.
Saunoa Maria, o le faiaoga Amerika ua nafa ma le Igilisi a o le faiaoga Aferika i Saute ua nafa ma le Komepiuta. E lē gata i lea ua iai foi faiaoga mo isi mataupu e pei o le Multimedia in Business atoa ma le Management mo nai alo ma fanau e lē o mafai ona ulufale i Iunivesite.
Faafetai mo nei fuafuaga faaalualu a le malo o loo mafai ai ona faataunuuina le fesoasoani mo o tatou tagata ua saili malo i Ausetalia.
