O le pitonuu o Tawa i Ueligitone na maua ai ni alii talavou se toalua (taofia igoa) ona o le tagovale i ni meaafale a ni aiga na la osofaia. O le Aso Lulu o le vaiaso na tea nei i le itula e 6 i le afiafi na maua ai nei taulelea o tu‘itu‘i i fale o aiga i lenei pitonuu ma faapea ona ulufale i ai ma faia le gaoiga o nei fale. E sao i totonu i faamalama o loo talai, ia poo faitotoa o fale ua galo ona loka.
Ua masani ona vaaia lenei faiga i pitonuu e tele o le laumua, o tamaiti ma taulelea talavou ua lē aooga pe faigaluega, o loo latou faasolo e fai le osofaiga o fale. Ua faapena foi i taavale e lē lokaina ae tutū i auala, ma o ni isi foi o taavale ua talepe lava i totonu o fanua o aiga.
O meaafale nei e gaoia o le tele lava o leitio, komepiuta, telefoni feaveai ma isi o masini faatekonolosi ua iai nei, faapea ma lavalava lelei. Na ta‘ua e leoleo ua maua ni isi oloa gaoia mai faleoloa ona e toe faatau atu i ai e i latou nei na gaoia. Ua tele le mativa ona ua tele le mumusu e o e faigaluega aemaise foi ua tele galuega ua tapunia talu lava le tala tau tupe a kamupani.
E saga faamanatu atu ai pea e le Ofisa o leoleo faapea lenei lomiga, ina ia mataala tagata uma i nei faatinoga lē talafeagai. O le itu e masani lava ona tupu ai o maota o nai tagata matutua ua lē mafai ona maua le malosi e tetee atu i nei tupulaga lē alolofa. E laki o le lē tafanaina.
O le tele foi o tagata e tele ina oso ese mai le taavale agai atu i faleoloa ae lē lokaina taavale, ma o iina e vave ai lava ona maua le avanoa e le gaoi e faasaolo ai i lau taavale poo lou fale foi pe a e lē lokaina lelei.
Ua lē gata pea le fautua atu o lenei itulau ina ia nofouta o tatou tagata mo ni osofaiga lē manaomia faapenei ma afaina ai o tatou aiga. Manatua ia vave lava ona logoina leoleo pe afai e iai ni masalosaloga i ni gaioiga lē talafeagai e te silafia i lou tuaoi ma ou vaifale.
