O le laumua o Fiti o Suva lea na aloaia ai se sainigalima i le va o le Ofisa o Malo o le Pasefika le FORUM ma le Sui Palemia o Samoa, Fonotoe Pierre Meredith ina ia faamatuu mai ai se tinoitupe e $4miliona tala Amerika mo le atina‘e o malosiaga tau eletise maua mai i le la.
O Samoa le uluai atunuu o le Pasefika ua maua lea fesoasoani ua faasafua mai e le Malo o Iapani mo atumotu o le Itulagi.
O le faamoemoe ina ia mafai ai e Samoa ona faatino lana atina‘e tele ua amata nei ona faagasolo ina ia saili ai se isi auala e maua ai le malosiaga tau eletise. O le taimi lenei i le siisii ai pea o le tau o le suauu o loo faaaogā i afi eletise ua agai Samoa i nisi auala e maua ai le malosiaga lenei. O le fesoasoani la ua faaauala mai i le Ofisa o le FORUM na talosaga i ai Samoa ma ua mafai ai loa ona faamatuu mai i lenei vaiaso.
E pei ona saunoa le Failautusi Aoao o le Ofisa o Malo o le Pasefika le Afioga Tuiloma Neroni Slade, e lē gata ina oo atu i le $350,000 tala Samoa le tupe o le a faasao e Samoa i tausaga taitasi mai i le suauu mo le gaosiga o le eletise, ae o se auala foi lenei ua saga unaia ai le puipuiga o le siosiomaga o le atunuu ona o lea o le a tele ina faaaogā le malosiaga o le la e gaosi ai lea foi malosiaga tāua.
Ua tele taumafaiga a Samoa e ala i lona ofisa o suesuega i le taimi lenei ina ia saili ai nisi auala e maua mai ai nei malosiaga ona o le taugata tele o le suauu, ae o le isi lava lea malosiaga tāua o loo tele ina maua i atumotu o le Pasefika o le malosiaga o le la.
O le taimi lenei, o le Fale fou o Faamasinoga i Mulinuu lea ua faatutū ai meafaigaluega o loo aoina ai le malosiaga lenei o le la ma o loo ua faapea nei ona amata ona faaaogā ai le eletise mai i lea malosiaga i lea nofoaga.
Ua iai foi taumafaiga a Samoa ina ia sui le suauu popo i le suauu faatau mai ina ia faaitiitia ai le tele o le suauu faatau mai i fafo. Na ta‘ua e le Minisita o Tupe, o lē sa faapea ona nafa ma le Matagaluega o Puna‘oa Faalenatura ma le Siosiomaga i le faigamalo ua mae‘a atu, le Afioga Faumuina Tiatia Liuga, ua iai le faamoemoe ina ia oo atu i le isi lima tausaga ua mafai e le ‘afa o Savaii ona ola i le eletise ua faaaogāina ai le suauu popo e sui a‘i.
Ua iai foi le taumafaiga e vaavaai ai i le malosiaga e mafai ona maua mai i le savili ae talu ai o le tulaga o le tele pea o le vaitaimi o le mugala i Samoa ma isi atumotu o le Pasefika o lea ua agai ai lava e unaia lenei ituaiga malosiaga mo le atunuu i le lumanai.
O le faafetai na saunoa i ai Tuiloma ona o le fesoasoani mai a Iapani i le taumafaiga tele lenei a le Pasefika, ma o le a tulimatai foi le faagasologa o galuega a Samoa e ala i le EPC le malosiaga tau eletise, ina ia mafai ai ona faatino le galuega mo le gaosiga o le eletise mai i le malosiaga o le la.
O le taimi lenei o le tele o afi o loo faaaogā lava le suauu ma le vai e gaosi ai lea malosiaga ma ua lē ‘asa se masina ma le siisii pea o le tau o le eletise ona o le faaauau ai foi ona siisii o le tau o le suauu mai i fafo.
Mo le FORUM, o le tupe lenei o le a faatino ai lenei galuega tele ua mafai ona faamatuu mai ina ua faamalieina le Fono tele lenei a le Itulagi i le faataatiaga o fuafuaga a Samoa. Ma o atumotu uma o le FORUM ua iai lenei seleni mo i latou auā le faatinoga o atina‘e faapea.
O le unai a le Pasefika ina ia iai ni auala e mafai ai ona tali atu le Pasefika i le tulaga faaletonu o fesuiaiga o le tau o iai nei ma o se tasi lenei o auala ina ia faaitiitia ai le faaaogā o le suauu lenei auā a susunu e manino le afaina ai o le siosiomaga.
O faiga nei o loo faamalosia foi i totonu o le Fuafuaga a le Pasefika ma Manulauti o le Meleniuma a Malo Aufaatasi, ina ia oo atu i le 2015 ua matuā faaitiitia le faaleagaina o le siosiomaga e ala i auala e pei o le sao atu o le kasa oona mai i vailaau e pei foi o le suauu susunu.
