Maua le fusi uliuli ile Karate e Elijah Mareko o Porirua

Le alii o Elijah Mareko i le itu agavale ma Nino Mason, na toleni faatasi i Midcity Kyokushin i Cannons Creek, i Porirua
Le alii o Elijah Mareko i le itu agavale ma Nino Mason, na toleni faatasi i Midcity Kyokushin i Cannons Creek, i Porirua

Ua matuā fiafia tele Elijah i lenei taaloga ole Karate, ma ole aso 8 o Oketopa na tauva ai lenei alii Porirua e 12 tausaga e sailia le fusi uliuli ile Karate. O lenei sailiga na faia i Aukilani ma ose taimi faagaeetia foi o lona aiga mo ia aemaise le fiafia o Hale Pahetogia lana faiaoga mai le kalapu a Mid City Porirua Kyokushin.

Na ulufale Elijah ile kalapu ina ua ono ona tausaga ma sa ia ta‘ua e na te lē iloa poo ā mea e oo iai, ae peitai na matuā taunuu vave lava mea uma i ona tulaga talafeagai ma tatau ai.

Fai mai Elija, “Na ou tuputupu a‘e ma matamata i ata kung fu ma ole karate la le taaloga na ou fiafia iai”. Na ia ta‘ua foi le faamalosia pea o latou e lo latou faiaoga o Pahetogia ile taaloga ma e lē na ole fusu karake ae ole faaaloalo na faamuamua ile taaloga, ma o itu tāua ia na ia aoaoina ai.

Sa ta‘ua foi e Elijah na faigofie lona maua ole taaloga ma fiafia iai i taimi uma o aoga, ona e fefiloi ma itu mālie faafiafia loto i isi taimi. Ole aso ole sailiga ole fusi uliuli na umi tele le faagasologa, ona sa amata mai ile faamalositino, sa tamoe mole 3 kilomita, faaalia tulaga o tomai amata ole taaloga, sue ile suega tusitusi, fai le suega e aofia ai le 100 o pushups, 100 situps, 100 stick jumps, ole sipa(sparring), faaali ituaiga o katas poo gaioiga faatulagaina, faapea ma break boards. Fai mai Elijah, “I was tired, but was glad I had finished it all”.

Na ta‘ua foi e lona faiaoga o Pahetogia, “O Elijah ose tama e atamai ma filigā i lana taaloga. Oloo faamoemoe foi e fai o ia ma tagata e tolenia isi tamaiti. Ose sui faapitoa ole kalapu ua ia ausia le fusi uliuli i lenei tausinioga”. O Elijah ole alo o Norman Mareko male faletua ia Tina Mareko ole ekalesia PIPC i Porirua. O Elijah ose alii e fiafia tele ile Aoga Aso Sa, ma e fiafia foi ile lotu i Aso Sa taitasi. E iai faatasi ma ona tuafāfine ma ona mātua. Oloo iai le faamoemoe o Elijah e ulufale atu ile Kolisi a Aotea ile tausaga fou, ma e momoli atu ai le faamalo tele i lenei alo ole atunuu ua amata ona laasia tulaga lelei i lenei foi taleni ole karate e pei ona faamanuiaina ai ile fusi uliuli (Black Belt).