O le agana ua masani ai le toatele, ‘O le fili lava o le tama o le maua’. O se faaupuga e faamālie, peitai a oo lava ina matuā auiliili lelei lona uiga, e foliga mai e ono tigaina ma tiga aemaise lava i lē ua maua sana faiga faalilolilo.
E lei atoa lelei le lima o aso talu ona tiliva ma ave i tua le taavale a se tasi o aiga Samoa sa faatau i le kamupani faatau taavale i Manukau pe tusa o le lua vaiaso talu ai, ae pē le taavale ma sa lē toe mafai ona faaaogāina. Sa ta‘ua e le tamā o le aiga lea sa faatauina le taavale, e tupu le faaletonu a o malaga i luga o le motorway e agai i lana galuega. Sa faateia o ia i le mea sa tupu ona e lei iai sona manatu o le vave lea e ono tulai mai ai se faaletonu i lana taavale, ona e lei umi ona aumai.
Sa toe lipoti le faaletonu i le kamupani sa latou faatauina le taavale, ma taumafai le tamā e faamatala i ai le mea moni sa tupu, peitai sa lē mamafa i le faletaavale le mataupu, ma tuuina ane ai se faamatalaga e faapea, e lē mafai ona toe fesoasoani ane ona ua mae‘a ona sainia pepa mo le faatauina o le taavle.
O lona uiga ua i lima lava o le tamā ma lona aiga ni faaletonu e ono oo i ai lea taavale e aunoa ma se toe fesoasoani ane i ai o le kamupani.
Sa toe taumafai i ai le tamā, peitai sa faapea ane le sui o le kamupani, e ave le taavle i le fale inisinia sa latou faasino ane e fai ai, na pau lea o le fesoasoani. Sa toe fesili i ai le tamā poo ai e totogia le pili a le fale inisinia. Sa tali ane le kamupani faatau taavale, e totogi lava e le aiga, ona ua uma ona latou faatauina le taavale.
O le fia maua e lea aiga o se fesoasoani, sa sulufai mai loa i le ofisa o le Radio Samoa ma le Samoa Times, pe maua ai se fesoasoani fetaui mo le faafitauli.
O le mea moni ua matuā popole le tamā o le aiga ona e foliga mai o le a tafea i le auau lana seleni sa faatau ai le taavale, a o lea foi ua toe faalava ane ma le pili o le fale inisinia latou ia, pe afai ae faatino le galuega mo le toe faaleleia o le taavale.
O le taunuu ai o le aiga i le ofisa ma vaavaai toto‘a i ai, atoa ai ma le fesiligia i nisi o mafuaaga, sa manino ai, o le mataupu e faigofie, peitai ua amata ona eli e le kamupani faatau taavale lona lava lua e tanu ai, pe afai ae teena vaega o le tulafono e manatu ua solia ma lē tausisia i le tulaga o fefaatauaiga.
E lei maimauina le taimi o le Samoa Times e tau faia ai ni suesuega agai i le tulafono ona sa mautinoa mai lava i le amataga o le faatinoina o le galuega faatau taavale, ua faamaonia lava le solia o le tulafono, atoa ai ma le pepelo ma le gaoi ia poo le lē malamalama foi o lē sa faataunuuina le maliliega ma le aiga.
Sa fautuaina e le Samoa Times le aiga ina ia mulimulitai i mea uma sa faatonuina e fai, aua lava nei toe solomuli, pe toe suia foi le fuafuaga ma le faaupuga e toe foi e finau ai le mataupu i le pule o le kamupani. Sa faataunuu e le aiga mea uma sa fautuaina ai, peitai e lei atoatoa ona talia isi vaega sa fautuaina ai. Sa toe tuu i ai le avanoa i le fale taavale, ma le faaupuga e ta‘u i ai o le avanoa mulimuli foi lea, e toe faafoi uma ane ai le seleni e aunoa ma se vaega latou te taofia.
O le toe taliu faatolu i ai o le aiga ma finauina lava veaga sa faasino i ai, na mafua ai ona matala ane ma isi mau avanoa e fesoasoani ai le kamupani ina ia faamalieina. O le oo o le mataupu i le alii pule o le kamupani, na siilima ai loa, ae tuu ane le avanoa e filifili ai le aiga mo se isi taavale poo le toe faafoi ane foi o le seleni e pei ona sa faia o se taunuuga o le faaiuga pe afai ae teena pea le faaauauina o lo latou tiute sa tatau ona fai i le taimi muamua.
E tolu ni vaega tugā sa lē silasila i ai le kamupani faatau taavle, ma e manatu o vaega foi ia sa latou lē tausisia. E manatu le Samoa Times, o pogai maumaututu ma mafuaga tāua tele, ma e tusa ai ma fefaatauaiga o lea foi oloa, e matuā solitulafono ai lea kamupani.
O le mafuaaga foi lea sa fautuaina malosi ai lea aiga ina ia aua ne‘i solomuli, ae ia mauaa le finauina o le mataupu. E iai foi itu ogaoga e matuā aafia ai le kamupani faatautaavale, pe ana fai ae oo le mataupu i ona ooga e tatau ai, ae faafetai ina ua masuiga mālie i tua le mataupu, a o lei laasia le isi sitepu.
Ua ofoina ane nei e le kamupani le isi taavale e telē atu lona tau, pe taugata foi nai lo le taavale sa faatauina muamua e le aiga. E lē gata i lea, a o se taavale anagata foi toe fou lona tausaga, e sui ai le taavale a le aiga talavou e pei ona tau sao ai le latou pea lualua, ae galo ai e malosi ai le pea sai a le tagata faatau. Sa fesiligia foi le aiga po ua fiafia ma malilie i le faaiuga o le mataupu, ae sa matuā talia lelei e le aiga le tulaga ua toe faafoi i ai laua, ma ua lē toe manatu ai foi i le seleni, ona o le loto malie.
