O lea ua toe o se aga tuua Samoa e le au aloaia a le atunuu mo taaloga o le Olimipeka ae ua tulai mai foi se isi faaletonu i le sauniga a le au siisii. Faaalia e le alii Peresetene o le Asosi Siisii Uamea Mamafa a Samoa, le alii faiaoga foi lea o Tuaopepe Jerry Wallwork, ua faataotolia le tamaitai siisii o le paga mamafa, o Ele Opeloge i le gasegase o le tanesusu.
O lona uiga e tasi le vaiaso atoa o toleniga ma sauniuniga a lea tamaitai taalo o le a faataatia ese ona o le gasegae ua aafia ai ana tapenaga.
Faaalia e le alii faiaoga e tāua tele le maua atoatoa e Ele o lona malosi auā nei tapenaga, ma o le a taumafai ia vave ona foia le gasegase ae toe agai lenei sui o Samoa i ana tapenaga mo le tausinioga o le siisii i taaloga tele o le Olimipeka.
O lea foi na mālōlō Ele i le masina o Iuni a o sauni ai mo tausinioga o le siamupini o le Oceania ma Malo o le Taupulega le Commonwealth and Oceania Championships. O le taimi lea na aafia ai le tamaitai lava lenei i le fivataifoi. Faaalia e Tuaopepe e ese le tele o aafiaga o si nei tamaitai a o taumafai ai mo se pine muamua a Samoa i tausinioga maualuga nei o le Olimipeka.
O le taimi lenei ua see atu Ele Opeloge i le tulaga lima i le faagasologa a tamaitai siisii uamea mamafa a le lalolagi i le paga mamafa o lea itupa. Sa i le tulaga fa ma o le taumafaiga a le alii faiaoga i le taimi lenei ina ia malaga ese Ele ua malosi ma ua mafai ona taulai ana tapenaga i se maualuga e mafai ai ona maua se pine mo Samoa.
O le mau a le alii faiaoga e matuā le faigofie lea taumafaiga ae e lē iloa lava le mea e tupu, o sana faamatalaga lea i tusitala. Na faamanatu mai foi le alii faiaoga i le tele o faaiuga ia na molimauina i le tausinioga tele na talimalo ai Samoa ia Iuni i le toatele o tagata siisii lelei o le lalolagi na aafia lava i ia tausinioga ma lē mafai ai ona maua le avanoa e tausinio ai i le Olimipeka.
O sui e toalua o Samoa ia na iai le faamoemoe e sii i le Olimipeka o Niu Sila, Opeloge ma Faavae Faauliuli ae o manu‘a o Faavae ma le lē ausia ai o sii e tolu a Niu Sila na le faamautuina ai loa a la taumafaiga ina ia sao atu i taaloga o le Olimipeka. Faaalia e le alii faiaoga, o loo lelei sauniuniga a le isi sui o Samoa lea ua mafai ona tauva i le Olimipeka, le alii o Toafitu Perive lea e sii i le mamafa o le 77 kilokalama.
O lea na siamupini i le Oceania lea alii i lana sii tuufaatasi e 288 kilo. O le siamupini i Malo o le Taupulega i lea paga o le alii Initia o Kumar Sathish Sivalingham lea na tuufaatasi ana sii ma maua ai le mamafa e 297 kilo.
O lea o le a taumafai Toafitu e ausia lea mamafa ae e lei talanoa lena ia i latou o loo i le vaega maualuga e manumalo ai i pine o taaloga o le Olimipeka.
O le lelei o taumafaiga a Toafitu Perive na maua ai loa ma lona avanoa e tausinio ai i taaloga o le Olimipeka.
Mo Ele Opeloge, o le vaiaso atoa la lea ua faamalolo ai auā e lē mafai ona soso i autafa o isi au taaalo a le asosi o loo sauni atu i isi foi tausinioga faavaomalo ma e seiloga lava ua pepē atoa le tanesusu ona toe agai loa lea i le fale toleni a o lei tuua Samoa mo ia tausinioga i Peretania.
