Ua iai se taumafaiga a le Soifua Maloloina ua faagasolo nei ina ia mafai ai e le tupulaga talavou e lē o iai ni galuega ona saili galuega i ai.
O ituaiga tausi soifua ia ua faapea ona agai e fesoasoani i tausi soifua ua pasi ma ua lesitala auā galuega fesoasoani.
O i latou ia ua ta‘ua i le gagana peretania o auxiliary nurses. O le latou galuega o le tapena lea o moega o ma‘i, o le feagai ma galuega fesoasoani i le fuaina o le fiva, fuaina o le toto ma galuega amata ia e faia e tausi soifua i le taimi e agai atu ai le mamalu o le atunuu e vaai se fomai.
O le taimi lenei ua faasolo ai aoaoga i nisi o le tupulaga o tamaitai ma alii e lē o maua ni galuega i le taimi lenei ae o lea ua iai le avanoa lenei ua tatala e le matagaluega ina ia mafai ai ona aoaoina nei fanau a le atunuu mo lea foi ituaiga galuega.
Faaalia e le Matagaluega o loo toatele o loo moomia e faia galuega fesoasoani nei i falemai i itumalo eseese o le atunuu, ma o le mafai ona faatino o fesoasoani nei o le a vave ai foi ona faagasolo isi galuega e pei o le faia o fusiga, o le faia o tui ma le siaki o isi vaega o le tino ma totoga o se gasegase, o galuega patino ia mo i latou ua iai le tomai ma ua pasi mai i aoaoga faatausi soifua i totonu o le atunuu.
E lē mafai e tausi soifua fesoasoani nei ona o latou lotea lava ni tulaga tau i togafitiga faafomai ona e lē o pasi ai ma e lē o lesitalaina e faatino ia galuega.
O isi matafaioi o feagai ma i latou e aofia ai fesoasoani i tupulaga talavou o loo feagai ma faafitauli o le soifuaga e pei o tamaitai laiti ua aafia i ma‘itaga lē manaomia, o le tagofia o le ‘ava malosi ma le ulaula tapaa.
E lē gata i lea, a o isi faama‘i lē pipisi pei o le toto maualuluga ma le suka, ae e iai foi le tulaga faatapulaa e gata ai a latou galuega fai.
Talu ai ona o le tele lava o faafitauli o loo feagai ma tupulaga talavou, o le ala lea ua filifilia tasi ai le Matagaluega ma le Vaega o le Soifua Maloloina i latou nei, e fefaasoaa‘i faatasi faafitauli ma isi foi tupulaga talavou i afioaga i tua.
E lē gata la i tupulaga i Upolu ae o le vaiaso lenei ua faagasolo ai aoaoga a le Matagaluega mo tupulaga talavou e fia faia lenei galuega i le motu tele i Salafai.