Ua lē o toe malolo le faagasologa o galuega a le Ofisa o Faigapalota i Samoa i le taumafaiga lea e lesitala uma i latou e tatau ona lesitala auā le faiga palota tele a Samoa i le tausaga fou. O se galuega ua agai ai lava i tua le aufaigaluega i afioaga uma o Samoa mo le faatinoga.
Ua taumafai ai foi e aveese le amio lea na amata vaaia i le faigapalota tele na mae‘a atu o le alu o le taimi o sui tauva e ave tagata o afioaga ma o latou itumalo e lesitala i le ofisa o faigapalota i Mulinuu. O lea la na amata lava le tausaga ua unai loa le agai o sui o le ofisa o faigapalota i afioaga uma ona o le tau taofiofi ai o nei faiga ma ia mautinoa ua lesitala uma le atunuu. E pei ona silafia o le solitulafono le lē lesitala i le palota auā ua aiaia faaletulafono lea galuega i soo se tagata e atoa le 21 tausaga a o lei oo i le aso o le faigapalota. O le faiga lea na unai e sui tauva i le palota ua mae‘a atu na mafai foi ona faauiga e nisi o ni faiga faaalatua auā ua foliga mai ua faamalosia ai fua i latou e lesitala ma ua momoli i taavale a sui tauva agai i le fale palota ina ia palota mo le sui lea ua alu lana taavale e momoli ai oe i le ofisa o faigapalota mo le faia o lau lesitala.
O galuega nei na maua ai nisi se toalua o le itumalo faaalalafaga o Vaimauga i Sisifo ua lesitala faalua. Ua mae‘a le lesitala sa ave sa‘o ai suafa ae toe maua mulimuli ua ave pepa fanau o isi ua fai ai isi lesitala o lona uiga na ta’ua e le ofisa o Faiga palota e foliga mai sa iai le manatu e faalua ona palota ae o le faafitauli o lea ua iai masini ua sau sa’o lava le igoa o le tagata ma lona ata ma o iina na maua ai aemaise foi o le faailoga o le lima matua lea e faatino foi i le ata o le tagata lesitala ma le tagata palota. O loo ua tuu atu nei la suafa o i la’ua na taumafai e fai le pi’o lenei ma le lapataiga a’o le iai nisi tagata e faatinoa lea foi faiga ina ia taofi nei loa fuafuaga faaalatua nei.
Ua ta’ua foi e le ofisa o faiga palota, o lea ua tuu atu suafa o le to’alua lea i le ofisa o leoleo ma o le a molia i lalo o le tulafono o faiga palota i le faia o uiga pi’opi’o i le lesitala.
Ta’ua e Mathew Lemisio o le alii loia o le Ofisa o Faiga Palota e tele lava foi isi taumafaiga a tagata ina ia soli ai tulafono o le faatinoga o lenei galuega ma o lea ua malosi lava foi faasalalauga faalauaitele ina ia unai aoaoga mo tagata o le atunuu e taofi nei faiga e fuafua iai aemaise foi o sui o le a tamomoe mo le sailiga o tofi o le Palemene. E tele lava tausaga ua laga ai faitioga i le faatau o le palota ma ua tele sui ua faapea ona toe aveese lava tofi na manumalo ai ona o tagi ua ave ma faamaonia i luma o le faamasinoga o faiga palota ia e faatautaia i le mae’a ai o faiga filifiliga faapea a le atunuu.
O le taumafaiga la lea ua unai e le ofisa o faiga palota a’o loma ai le palota tele a le atunuu ia oo atu i le tausaga fou ua manino le atunuu e le o toe sao lava ni uiga aemaise foi amio ia e tele ina vaaia i aso o faiga palota.
