Maua e mea pueata le gaoi pisupo tolu pauna

O se tina talavou e nofo i se pitonuu i le taulaga i Apia o loo suesueina e leoleo i se tuuaiga na ia gaoi ni oloa e aofia ai se pisupo tolu pauna mai le faleoloa o Farmer Joe i Vaitele-tai.

O lea tina e pei ona faamatalaina e se molimau sa maua lana gaoiga e mea pueata a le faleoloa, ae sa faafiti ma ia teena e ui sa ave e se tagata ffc aigaluega ma faamatamata i le lipine na pu’e ai lana gaioiga.

Ua faaalia e leoleo e tele ni gaioiga faapea ua mafai ona maua ona o mea pueata ua faaaogā e nisi o pisinisi e pei o faleoloa, ma ua fesoasoani malosi i le taofia ma le pueina o tagata e faia lea solitulafono.

Na faaalia e se molimau mai le ofisa o leoleo e faapea, o lea tina e masani ona vaaia soo i le faleoloa o Farmer Joe ma o se tasi e tautalatala ma e lē umi ona talanoa ma se tagata ae pei lava ua leva ona la masani.

O ana tala ma gaioiga e iloa ai o se tagata e faigaluega lelei, ae peitai o loo natia ai se isi gaioiga o loo ia fuafua e faatino.

O lana gaioiga na faia i le faleoloa na faamatala e se molimau e faapea e lua ni ato sa tauaveina e le tina i le aso na faia ai lana gaioiga solitulafono.

“E lei leva ona alu i totonu ae toe tofu mai i fafo, ae na mafai ona maua ma fesiligia loa poo ā ana faatauga sa fai i le faleoloa”.

Fai mai le molimau o le taimi na avatu ai le mafine e faamasino na vaaia e nisi o le au faigaluega o le faleoloa le taavale faafuasei ane o se pisupo tolu pauna ma o le talitonuga o le tasi lea o oloa tau taumafa tuuapa na ia fafao i lana ato.

Na malaga le mafine ma se tasi o alii o le au faigaluega i se taavale a le kamupani mo le ofisa o leoleo e molitai i ai mo se suesuega, ae o le latalata o le taavale i moli faasino ala o loo i le magatolu i Taufusi feagai tonu ma le kamupani o HJ Keil, na oso ai i fafo le tina talavou ma tamoe faavave ese e ui atu i se auala taloto o loo i le va o le falepeepee ma le fale asikulimu o le Apia Bottling.

E lei foi ai le alii o le faleoloa o Farmer Joe, ae na faatu le taavale ae fai loa tuliga agai atu i tua o lea vaipanoa na tamoe i ai le mafine.

Na ta‘ua e le molimau e iai se togavao ise tasi o vaega o le nofoaga na momo‘e i ai le tina ma e taunuu le alii o le faleoloa ua nimo ae leiloa poo fea ua agai iai.

Na fesoasoani iai nisi o lea pitonuu ile sailiga o le mafine, ae na maua taitaia ina ua vaai atu le alii faigaluega o onoono mai vae o se tagata i lalo o le faapuloulou vao.

Na toso mai i fafo ma toe avatu i le taavale ma faasasao loa i le ofisa o leoleo, ma o nisi foi  o leoleo sa tiute ai i lea vaega o le taulaga na logo tala i le mea ua tupu na faavave ane ma fesoasoani i le sailiga o le mafine.

Faaalia e leoleo ua taunuu atu ni molimau ua faaalia ai o lea tamaitai e masani ona maua i nisi o faleoloa tetele o fai ai lana galuega lea o le ave faagaoi o oloa.

Ua mautinoa e pei ona faaalia e leoleo o le a faia ni moliaga faasolitulafono ma tulai i le faamasinoga.