O le faleoloa o le Coin Save i Fugalei na agai i ai se alii ua fasefulu ma ona tupu ona tausaga mo sana faatauga na ia faaaogā ai ni tupe taufaasese.
Na faamatala le tamaitai faatauoloa o le Coin Save i Fugalei (taofia le suafa), e lua ta‘i selau tala tupe pepa na faia ai le faatau a lea taulealea.
Na uma ona fai lana faatau ona alu ese lea, ma agai i le isi faleoloa o le Coin Save o loo i le fogafale i lalo o le Faletupe o Atiina‘e i le itu i Sasae.
Na faamatala le mafine faatauoloa, e alu ese atu le alii ae maua ane ina ua suesue ana ta‘i selau tala na avatu, o ni tupe taufaasese.
Na logo loa e le aufaigaluega le isi faleoloa o le Coin Save o loo i le Faletupe o Atina‘e ina ia vaavaai ane se isi tagata e toe alu atu ma ni tupe faapea.
Peitai na faaalia e le tamaitai faatauoloa, e lei uma atu ona logo le isi lala lea o le kamupani, ae sau le valaau i le telefoni ua maua foi ni tupe taufaasese, ae o se tamaloa foi e fai lana matatioata pogisa sa fai lana faatau na avatu ai ia tupe.
Na logo e le alii Saina o vaaia le Coin Save i Fugalei le alii pule sili i le Coin Save i Savalalo, e fai i le tamaloa lea e alu atu i uta se‘i la talanoa i se mataupu tāua ona e iai sana faatau ua galo. Fai mai pe o le sefulu minute talu ona upe tau maea ona logo le tamaloa, ae oso i lana taavale e faapea o se tiliva ma alu loa i le Coin Save i Fugalei.
Na te lei iloaina o tupe taufaasese na mafua ai ona manaomia lona toe alu atu, peitai e lei leva ae tutū alii leoleo e toafā ma faia ai loa suesuega.
Na faamatala le tamaitai faigaluega o le Coin Save, na maua e leoleo ni fusi tupe ta‘i selau tala o loo umia e lea taulealea, ma o lana faamatalaga o ni tupe taufaasese uma, ona o le tala ane lea a leoleo i le latou tamaloa pule.
Fai mai le tamaitai faatauoloa, e iai foi se alii talavou na oo atu i le aso lava lea na maua ai le tamaloa ma ana tupe taufaasese, ma faatau ni sipika se lua i le $200 tala, peitai e suesue atu foi o ni tupe taufaasese.
O le Aso Tofi o le vaiaso nei 30 o Iuni 2011 na tulai mai ai lea gaioiga faasolitulafono na aafia uma ai faleoloa o le Coin Save i Fugalei ma Savalalo.
O loo lapataia pea le atunuu i faasalalauga i televise ma nusipepa faapea leitio ina ia mataala i tupe taufaasese.
E lei maua se fesootaiga i leoleo i lenei mataupu ae ua faaalia e se molimau o loo taofia nei le tamaloa na maua i ai tupe taufaasese mo suesuega.
