O se vaega o le polokalame o le tauvaga tautalaga i le Aso Faraile na tea nei na faatinoina ai se foai tāua, o se pine taualoa, e tusa o le tautua faifai pea i tausaga e tele i le galuega a le FAGASA i totonu o le lala i Ueligitone.
O le Afioga i le Komesina Sili, Leasi Papaalii Scanlan na tauaaoina lenei faaaloalo maualuga o le pine taualoa i le faletua ia Fualili Felaga‘i ona o lana tautua matavela i le FAGASA i galuega uma i tausaga e tele.
O loo galue pea le faletua o Fualili Felaga‘i i totonu o le lala a Ueligitone ma o lana foi lea tiute o loo fai i tamaiti o lana aulotu o le faatāuaina o le Gagana Samoa i Aoga Aso Sa o loo avea ai ma faiaoga.
Avea foi lenei laupepa e momoli atu ai le faamalo ma le faafetai tele i le faletua ia Fualili ona o lenei faaeaea maualuga ua ia mauaina mai le Faalapotopotoga o le Aoaoina o le Gagana Samoa i Aotearoa (FAGASA).
O loo tatala pea le avanoa mo i latou e fia lagolagoina lenei galuega ina ia tatou galulue faatasi e opogi la tatou gagana o le tofi mai le Atua. Talia soo se tasi e fia avea ma sui tautua o le FAGASA i soo se lala i Aotearoa.