E lei umi atu nei talu ona faavae le ekalesia fou a le Faapotopotoga Kerisiano Samoa i le afioaga o Nuu ae o lea ua amata ana polokalame mo le atina‘e o ona tagatalotu aemaise i fanau laiti.
O tagatānuu o Samoa o loo i totonu o Ausetalia na maua mai ai se fesoasoani o masini computers mo lea aulotu.
O le susuga i le alii faipule, le afioga Lafaitele Patrick Leiataua Lesa, o le sui faipule o Alataua i Sisifo ae o le sui sooupu lea o le faalapotopotoga i Ausetalia na maua mai ai lea foai.
O le tausaga na tea nei lea na fesootai atu ai le aulotu fou lenei mo se fesoasoani mai lea faalapotopotoga o tagata Samoa o loo nonofo i Brisbane Ausetalia.
Talu ona faavae lenei aulotu ua manino le toatele o fanau ma tupulaga talavou. O se nofoaga tutotonu la mo a latou aoaoga lea ua mafua ai le talosaga ma o se avanoa foi lea e lē gata ina faalautele ai le tomai i le faaaogāina o nei masini i fanau, ae faapea foi sui matutua o lea aulotu.
O le faaiuga la o le vaiaso na faapaia ai le agalelei o nei tagata Samoa i totonu o Ausetalia ua mafai ai e le tupulaga ma aiga o Nuu ona maua se nofoaga e agai iai mo le faamautu o meaaoga a le fanau aemaise foi o fesootaiga o loo moomia le iloa ona faaaogā e tagata matutua o le afioaga ma lea aulotu.
