I se tala lata mai i le ofisa o le vaegaau poo le ami a Niu Sila ua faaalia ai le manaomia tele o tagata mai le Pasefika o loo nonofo i totonu o Aukilani i Saute ina ia ulufale atu i le Ami. O se tala lelei tele lea mo i tatou aua o lea ua maua nisi o avanoa mai lea matagaluega o puipuiga ma osofaiga a le tatou atunuu o loo faapea ona tatou ola ma soifua ai.
O lenei vaega o le Ami a taua o le Delta Company o le a i lalo lea o le faauluuluga a le ofisa autu ua taua o le 3rd Auckland Batallion i Aukilani lava. O fitafita uma faavaitaimi (part-time) o loo auai i le taimi nei, e na o le luasefulu lava aso o le tausaga e manaomia ai le auaunaga a i latou o le a ulufale atu i lenei vaega o le Ami. Vagana ai ua filifilia oe mo se malaga tausi filemu i Solomona, East Timor poo isi atunuu o le lalolagi.
Talu ai ona o Niu Sila o se atunuu laititi, e tatau ai lava ona lelei sauniuniga ma fuafuaga aua le saogalemu o tagata uma. O le autu o le toe faatuina o lenei vaega o le Ami i Aukilani i Saute, ona ua maitaulia e taitai o le Ami le toaititi tele o tagata Polenisia o loo faatasi atu i le Ami i lenei vaitaimi. O lona uiga foi la e le o maua e o tatou tagata nei faamanuiaga o loo auala mai i lenei faalapotopotoga. E iai aoaoga i matata eseese e pei o le inisinia, kuka, mea tau aupega ma le aoaoina o le faatupu ma le vaavaaiga o le filemu, tulafono faamiliteli ma aia tatau aemaise le aupega taua lea o le amio pulea ma le usitai. E faapea foi ona maua totogi o le fanau i soo se taimi lava e auai atu ai i ni toleniga i faaiuga o vaiaso e taitasi i le masina.
O le Afioga ia Tuala Ponifasio, o ia lea o loo taitaia le faaulufaleina o tagata Pasefika ua agavaa mo lenei faamoemoe, ua mataituina e le Ami a Niu Sila se tulaga maualuga tele sa iai le tautua a o tatou tuaa sa auai i le ami i aso ua mavae. O le tuu avanoa mai la a le Ami i o tatou tagata, o le amanaia foi lea e le Ami a Niu Sila o le lelei tele ma le agavaa o tagata Pasefika i galuega faatino a le militeli.
O le Afioga ia Ponifasio, o ia lea o se Alii loia mai Samoa o loo tautua pea i le Ami a Niu Sila i le taimi nei. O ia lea ua avea nei ma faufautua ia Lieutenant Colonel Christopher Powell (Taitai o le Vaegaau 3rd Auckland Battallion) i Aukilani i le tulaga o le faaulufaleina lea o alii ma tamaitai Pasefika mo le toe faavaeina o lenei vaegaau i Aukilani i Saute. Na saunoa Lieutenant Colonel Christopher Powell e faapea, e faataua tele e Niu Sila le sao o tagata Pasefika i itu eseese o le Ami poo le Militeli foi a Niu Sila. O Niu Sila o loo iai ona tiute o le vaavaaia lea o le saogalemu i le Pasefika e aofia ai ma Samoa. O le faaulufaleina la o ni alii ma ni tamaitai fou i lenei vaegaau, o le latou sao foi lea i le puipuiga o le saogalemu i atunuu uma o le Pasefika.
Mo nisi faamatalaga auiliili poo le lesitalaina o e o loo fia ulufale i le Delta Company, tagai ifo i le website: www pe imeli Tuala Ponifasio i le lawcentre@ipasifika.net poo ponifasio@hotmail.com
