Mau tofiga se alo o Samoa i le asosi a tamaiti aoga Iunivesite Aukilani

E ese mai le aoaoina o le atamai faaleaoaoga, ae ua faatulaga foi e alo ma fanau o loo aoaoina i le Iunivesite a Aukilani sa latou faalapotopotoga poo se asosi a tamaiti aoga, aua le faamaopoopoina o a latou meafai i totonu o le iunivesite, aemaise le faaoo atu ai o so latou leo i le pulega i nisi o mea e faaleleia atili ai le nonofo o fanau i totonu o le laumua a le aoga.
O le asosi la a tamaiti aoga, le Auckland University Students’ Association (AUSA) e tai tausaga ma faia suiga i o latou tulaga tofi, e pei foi ona iai lenei tausaga, 2009; ma e pei lava o tulaga masani, e faagasolo faiga palota i totonu lava o tamaiti o le iuni mo le filifilia o nisi i tulaga tofi a le asosi.
I le tausaga lenei, ua ofi atu ai se tasi o alo o Samoa, le alii talavou o Jordan P. Kwan, ia i latou ua mau tofiga i lenei asosi tele a tamaiti aoga, le AUSA.
O Jordan ua 20 tausaga o lona soifua, ma na ia taua, ‘lona matua fiafia ina ua manumalo i le tofiga o le Ofisa mo Mataupufai Tau Aganuu (Cultural Affairs Officer) faatasi ai ma le na la finauina faatasi lenei tofiga, o Gaaythri Nair.’
Ua lua tausaga o iai Mr. Kwan i totonu o le asosi i le tofiga o le ofisa poo le sui o tamaiti aoga Pasefika i le Iunivesite, (Pacific Islands Students’ Officer), e nafa ma le faaleoina ma faaoo atu manaoga o tamaiti Pasefika o loo aoaoina ai.
Sa avea muamua foi o ia ma peresitene o le asosi mo na o tamaiti Pasefika i le iunivesite a Aukilani (AUPISA). I le taimi nei foi o loo seei Jordan i le nofoa ua faatulaga mo se sui o fanau aoga, i se tasi o komiti tutotonu a le Iunivesite, le Human Participants Ethics Committee.
O fuafuaga a Jordan pe a amata lona tofiga fou i le 2010, o le a tauivi malosi ia faamautinoa o loo faataua le mataupu o le tutusa o tagata uma i soo se galuegafai a le asosi.
Ina ua faatalanoa e se sui o le au tusitala lenei alo o Samoa na ia taua ai, “E tele ni galuega ua ou faia mo fanau a le Pasefika o loo aoaoina i le iunivesite, faapea foi ma isi faalapotopotoga lava i totonu o le atunuu.
Ma e iai lou lagona, ua tatau ona faasafua atu ou tomai nei, ia le mo na o fanau a le Pasefika, ae ia tautua ai foi mo isi uso ma tua fafine aooga e lē toatele naua so latou aofai, o loo iai i lenei laumua.”
E talitonu Jordan, e taua tele le iai o se leo o fanau aoga i meafai, ma ia iai ni tagata talafeagai latou te faapupula maia i lumamea mataupu e pei o le siitai o pili o aoga nei, ia iai ni fesoasoani talafeagai mo tamaiti aoga a o iai i aoaoga, aemaise foi isi mataupu ia o loo afaina ai nai isi tamaiti aoga mai isi lanu ia e le o toatele ni o latou sui i totonu o le iunivesite, e pei o uiga faailogalanu, ma le faasinosinolima i le eseesega o itupa e iai.
O le isi manulauti a Jordan, ia uunaia fanau a le Pasefika o loo i aoga e maulalo le faatulagaga i tomai tau aoaoga (low-decile secondary school), ma isi uma tagata Pasefika ina ia tausinio ia oo i aoaoga e maua ai faailoga maululuga poo tikeri, ona mafai foi lea ona tele nisi avanoa o le soifuaga e filifili ai, ma tapena ai mo le mauaina o ni galuega o tomai maualuluga.
I le taimi a o faagasolo nei faiga palota mo le filifiliga o tulaga tofi o le asosi, sa mataina se vaaiga i nisi o fanau aoga sa laeiina laei faaleaganuu a o latou atunuu eseese, a o feoai solo e tufatufa a latou laupepa o loo uunaia ai le palotaina o se sui patino sa latou faatuina mo nei tulaga tofi.
O le AUSA, o le asosi pito sili lea ona tele a fanau aoga i totonu o Niu Sila, ma e tusa ma le luasefulu afe fanau aoga e auai atu i ai i lenei asosi i tausaga uma.
O le tausaga e 1891 na faavaeina ai, ma o loo tumau pea ona taumafai lenei asosi, e fai ma sui ma lagolagoina fanau aoga o loo aoaoina i le Iunivesite a Aukilani, aemaise le saunia o le tele o nisi auaunaga eseese aua se lelei o fanau aoga uma i le komiuniti.