Ua mautinoa nei e toalua lava alo tamaitai o Samoa e faamautu i atunuu i fafo ua lagona le agaga o le fia malaga mai e faamaopoopo le tauvaga e sailia ai se Tausala o Samoa o lenei tausaga i le vaiaso o le Teuila.
O ia tamaitai talavou sa lesitala mamao mai o la suafa a o lei tapunia avanoa sa faasalalau mo ni tamaitai e fia tausinio, o Janine Nicky Tuivaiti, 20 tausaga le matua mai Niu Sila e mai Faleasiu, o Levi ma Falelatai o loo aoaoina nei ile iunivesite o Aukilani .
O Talosaga Tautai 23 tausaga o le soifua mai Sini Ausetalia o loo feagai nei ma aoaoga i le tomai o le tausi soifua ma o ona nuu i Samoa o Lepa ma Siumu.
E toafā tamaitai mai Samoa lea e maua ai le toaono o tamaitai o le a sailia ai se tasi na te tauaveina le pale o le tausala o Samoa e aofia ai Helena Darlene Ainuu, o loo galue o se failautusi lagolago i mataupu tau tulafono i le ofisa loia o Ainuu Law Firm ma ua 21 ona tausaga mai afioaga o Apia ma Lepea.
O Le‘emo Aoina Tupu 21 tausaga le matua mai Lepea ma Toamua o loo aoaoina nei i le iunivesite aoao o Samoa mo lona faailoga o le Bachelor of Commerce ae o loo galue i se galuega faavaitaimi.
O le tasi o tamaitai mai Samoa o Miriama Siolo Fiu Alo‘ese mai afioaga o Sili ma Moataa ua 22 tausaga o lona soifua ma o loo galue nei o se tamaitai ofisa mo galuega faatausi tusi le accounts officer i le pisinisi nono tupe o le Faamaoni Loans.
O loo ia umia le tusipasi i tomai tau femalagaaiga ma tagata tafafao mai le aoga o le International Travel College and Tourism of NZ. O le tamaitai lona ono o Rezettakahealani Eric Mulitalo 22 tausaga o Vaitele-fou o loo galue nei i le vaega o le pulega i le kamupani gaosi tapaa o le British American Tobacco i Vaitele.
O loo umia foi e lea tamaitai le faailoga o le Bachelor of Arts in criminology and development studies mai le iunivesite o Ueligitone i NZ.
O le tasi lea o polokalame autū o le Teuila i tausaga taitasi, o le sailia o se tausala o Samoa, ma o lē o le a manumalo e fai ma sui o le atunuu i le tauvaga e sailia ai se tausala o le Pasefika.
O le tamaitai o Olevia Ioane o loo umia nei le pale o le Tausala o Samoa ma o le mae‘a o le tauvaga i le masina fou lea toe lua vaiaso ona faia lea ona faamuta lea o lana nofoaiga.
