Tuumalo CEO o le Pacific Media Network Trust – Tom Hardley Etuata
O se tala lava na matuā faateia ma lafo mai ai se ao pogisa o le faanoanoa i le toatele o uo ma ē masani, e latou te silafia lelei ma māfana atu i le susuga ia Tom Etuata, ina ua amata mai le vaiaso fou i lipoti o lona maliu faafuasei i le faaiuga o le vaiaso talu ai, Aso Toonai, 27 Oketopa 2012 i lona aiga i Aukilani.
O Tom o se tasi ua lausilafia e le toatele aemaise pulega o fesootaiga i ualesi faasalalau i le Pasefika ma Niu Sila, auā o inā e uma nei lona soifua o loo faaauau ai pea lana tautua galue.
Na lē manofo le toatele latou te silafiaina lelei lenei auauna lelei ma le agatamalii, ma ua tele foi feau faamaise ua feaveai solo i luga o fesootaiga i le initaneti, e momoli ai alofaaga ma saafiafiga i le tautua ma le soifua galue o lenei auauna.
O Tom Hardley Etuata o se alii Niue, o se alo faasino i le susuga i le faafeagaiga, Rev Tom Etuata senior ma le faletua ia Akeletama Etuata. Na faaipoipo atu i le tamaitai Samoa, le faletua ia Viola Timoteo-Etuata, ma e toatasi lo la alo, le tamaitai o Summer.
O Tom na soifua ane i Niue ia Me i le tausaga 1966, sa tele foi tausaga na galue ai i Samoa i galuega tau le makekiina o auaunaga faasalalaau e pei ona galua ai i le Talofa FM i Savalalo.
O le tausaga e 2003 ia Fepuari sa amata galue ai Tom i le Leitio Faasalalau 531pi ma galue ai i galuega tau pulega i le tausaga lava lea. Ina ua tulai mai le tuufaatasia o le auaunaga a le Radio 531pi a Aukilani faatasi ai ma le Radio Niu FM, na tofia ai foi lenei alii e avea ma faatonu i tulaga tau polokalame i le 531pi i lalo o le Pulega a le Pacific Media Network Trust, sosoo ai ma le tofia e fai ma Faatonu Lagolago i le 2008, ae avea loa ma Faatonu Sili (CEO) mo le Pacific Media Network Trust i le aso 8 o Aukuso 2009.
E toatele nisi o loo galulue nei i leitio Faasalalau i Niu Sila nei sa maua le avanoa e galulue faatasi ai ma lenei alii, ma e taga tutusa le tele o molimau a i latou uma, o Tom o se tagata e galue fiafia ma lē soona gaoiā, ma e filemu lava lona siomaga a o faatinoina i se tulaga sili ona lelei ona tiute.
O se gasegase faafuasei na maliu ai le susuga Tom, ma i se lipoti lata mai ua ta‘ua ai, o le Aso Gafua o le vaiaso fou, aso 5 o Novema, o le a fai ai toe sauniga o le susuga Tom i le malumalu o le St Timothy Presbyterian Church i Titahi Bay i Ueligitone.
O le a matuā misia lenei alii ona o lona tomai i mataupu e aafia tele ai Leitio Faasalalau, auā e lei faapito lana tautua mo ona tagatānuu Niue, ae sa telē lona sao i le uunaia o soo se meafai a le Pasefika, e aofia ai foi ma le sailia o i latou o loo iloga i le itu tau musika a le Pasefika, le Pacific Music Awards.
O se tasi foi sa iloga lona unaia o le tausia o se soifua maloloina, ma sa avea foi ma Failautusi Aoao mo le Asosi a le au Teuteutino a le Pasefika, South Pacific Bodybuilding Federation faapea lona sao i le Samoan Sports Awards.
Tau ina ia faamaise atu le agaga faamafanafana o le Atua i le faletua ia Viola ma si o la alo, faapea mātua pele, o uo ma le aiga faavauvau. O upu a le Tusi: “Amuia e faanoanoa, aua e faamafanafanaina i latou.”
