E vevesi lava atunuu o Europa i faaletonu o le tamaoaiga o le lalolagi lea ua toe agai foi i ai, ae ua manino e le na o tamaoaiga tetele o loo aafia. O nei suiga uma e aafia ai lava ma tamaoaiga o atunuu laiti.
O le sii lava o le tau o le suauu, sii foi le tau o le soifuaga ma o loo totogi uma lava foi e tagata lautele o soo se atunuu ia siitaga. O le tasi lenei o atina’e ua manino le aafia i lenei itu o le lalolagi, o atina’e o tagata tafafao maimoa mai i fafo.
E manino le tele o lea aafiaga i Samoa auā ua na o faletalimalo tetele ua vaaia ai le tumutumu o tagata tafafao mai Samoa, ae o le tele o faletalimalo laiti ua seasea vaaia le tumutumu sa iai.
O le mafuaaga foi lea na lua lelei ai lava masina o taofi nonogatupe e faia mo atina’e i le faletupe o Atina’e.
O le tuai mai o totogi o nonogatupe a faletalimalo laiti nei i le faletupe o Atina’e na fesoasoani tele i le leai ai o se seleni e mafai ona faagasolo ai nonogatupe a le Faletupe.
“O le aafiaga o le tamaoaiga o atunuu tetele ua leai ai foi ma ni tagata mai i fafo ma ua leai se seleni maua a faletalimalo nei. Leai ai ma se tupe e totogi ai aitalafu i lenei taimi o le tausaga ma taofia ai le faagasologa o tupe maua a le faletupe o atina’e,” o se saunoaga lea a le Alii Pule o le faletupe, le Afioga Tuiasau Saumani Wong Sin.
“O le faletupe lenei ua faamoemoe lava le faagasologa o ana galuega i tupe maua mai ia i latou o loo nono atu tupe ma faapea ona toe totogi mai, ma o le tasi lea o faafitauli na tulai mai”.
O le fesoasoani ua maua mai i faalapotopotoga tupe a Europa, le European Investment Bank, o le NPF a Samoa ma le Faletupe Tutotonu, sa tau faatalitali lava foi ma o lea ua amata ona vaaia le agai mai o se isi faasiliga i le tupe maua a le faletupe o Atina’e lea la ua toe tatala ai nei nonogatupe sa tau faatalitali i ai le toatele o le atunuu.
E tele faletalimalo laiti i Samoa ua fausia i nonogatupe mai i le faletupe o Atina’e, ma o se tasi o atina’e ua tele ina aapa atu le Faletupe e faamaopoopo auā ua vaaia foi le agai i luma, ae o le suiga lava o le tulaga o iai tamaoaiga o atunuu i fafo lea ua vaaia ai nei le laititi o le tupe maua i le tau faaiuiu ai o le tausaga.
O lea foi o loo faagasolo lava isi atina’e ua faatupe e le faletupe lenei e pei ona iai nei se isi foi galuega mo le fesoasoani ai i atina’e o fualaau ‘aina ma o se fesootaiga a le Faletupe o Atina’e ma le Matagaluega o Faatoaga ma Faigafaiva lea ua unaia ai lenei ituaiga atina’e i Samoa.
O loo faaauau foi galuega faatino mo nonogatupe laiti auā faalapotopotoga a tina ma tamaitai i afioaga mo le faatuina o faatoaga o fualaau faisua ma fualaau ‘aina faapea pisinisi o galuega taulima, ma e fesoasoani le isi tamaitai e faamaonia nonogatupe a isi tamaitai o se potopotoga lava e tasi.
O loo iai lava foi nonogatupe mo isi atina’e e pei o faatoaga, lafumanu ma atina’e o faigafaiva.
