E tolu mataupu ou te fia faaali atu i ai se lagona. O le fuafuaga a le Malo i le matagaluega o le ACC, o le finauga poo ai e faasalalauina taaloga o le lakapi i le tausaga 2011, ma le matou asiasiga i le aai tele o Kalaiesetete.
O le masina o Mati 2009 na ou tusia ai se tusitusiga e faapea o loo taumafai le Malo a le National ina ia faaleaga le matagaluega a le ACC ma ua taumafai le Malo e faatau ese lenei aseta taua a le atunuu i le aufaipisinisi fai inisiua.
O lea na tusi ai faamatalaga a le alii o Brian Fallow, Economics Editor o le NZ Herald na faia i le aso 12.3.09 fai mai, o faamatalaga faaleaga a le Malo e faasaga i le ACC, o se taumafaiga e faamatau ma faapopoleina ai le atunuu, ina ia faigofie ona taliaina e le atunuu fuafuaga a le Malo e faatau ese le ACC ona ua faapea ua gau ai le Malo.
Ina ua uma ona taumafai le Malo e faatalitonuina tagata lautele ua gau le ACC, ona taumafai loa lea e faaleaga le malo a le Leipa faapea na ufiufiina faaletonu o le tala o le tupe a le matagaluega a le ACC. Peitai ane, na maea lava le suesuega a le Malo ma ua mautinoa ai e leai se faaletonu o Minisita o le Malo a le Leipa, e leai foi se faaletonu i le faatinoina o galuega na faia e sui o le Komiti o Pulega a le ACC.
Ona tuli lea e le Malo le alii o Ross Wilson mai le tofiga o le taitaifono o le Komiti o Pulega a le ACC, ae tofi ai le sui o le faalapotopotoga o pisinisi tetele o le Business Roundtable e fai ma taitaifono fou o le ACC.
O Ross Wilson o se tagata sa finau malosi ina ia tumau le fesoasoani a le ACC i tagata faigaluega e manunua ona o faalavelave mai falefaigaluega ma feoaiga i auala tetele i Niu Sila.
Ona oo mai lea i lenei masina o Oketopa o lea ua fuafua nei le Malo e sii lafoga a tagata lautele e totogi i le ACC, ae aveese isi auaunaga a le matagaluega mo le manuia o tagata lautele, ma ua faapea mai lava o loo iai faaletonu i le tala o le tupe a le ACC.
O lona uiga o loo tumau pea le naunau a lenei faigamalo ina ia faatau ese lenei aseta i tagata pisinisi tetele ma le aufai inisiua. O lona uiga e sau se taimi o i le lumanai, ua pulea e pisinisi inisiua lenei matagaluega, ma seia vagana ua iai sau inisiua e le toe puipuia ma maua ni au tupe e pei ona masani ai, pe a manu‘a pe maua i se mai talu ai se faalavelave faafuasei i luga o galuega poo auala tetele.
O le fesili, pe aisea lava ua taumafai ai le Malo i lenei faiga? O le tali e silia ma le $4 piliona tala le tupe maua i tausaga taitasi a lenei matagaluega, ma o le tupe lea o loo naunau kamupani inisiua ia latou maua pe a tapuni e le Malo le matagaluega o le ACC.
O lenei vaiaso na aliali ai foi uiga faailogalanu o le Malo a le National ina ua taumafai e faaleaga le tauofoga a le Maori TV mo le faasalalauina o taaloga lakapi mo le ipu a le lalolagi i le tausaga 2011.
Ua ita le alii Palemia ma lana kapeneta o le a manumalo le tauofoga a le Maori TV.
Na muamua lava fai faamatalaga tau faamatau a le Palemia e faasagatau i le Maori TV ma le matagaluega o Mataupu tau Maori. Ona mulimuli ane lea ua lagolago e le Palemia le ofo a le TVOne ma le TV3, ae ua taumafai e faaleaga le Maori TV.
O le tama lea e taitai i le Maori TV e moni o le Maori ae e nofo i le teine Samoa, o se tagata e alofa tele i tagata Pasefika, ma o ia lea na taumafai loa e faasao mai le sese a le Palemia ma lana Kapeneta. E lei maea lelei lenei mataupu.
O le Aso Faraile ua te‘a na alu ai se matou asiasiga i Kalaiesetete ma le afioga Luamanauvao Winnie Laban, ma isi ou uso a faipule e asiasi i faalapotopotoga o loo galulue mo le manuia lautele o tagata Pasefika.
Na maua le matou feiloaiga ma le susuga i le faafeagaiga o Rev Lapana Faletolu ma alii ma tamaitai o le Aranui Community Trust o loo galulue malosi e fesoasoani i o tatou tagata mo le atinaeina o aiga i lea lava aai.
Sa faapea foi ona matou feiloai i le afioga ia Sala Johnson ma Samuga Poliko Vili o le Pacific Island Evaluation Inc o loo faufautua ma fesoasoani i aiga taitasi i soo se mataupu.
Na mulimuli matou feiloai ma le Pacific Trust Canterbury o se tasi o faalapotopotoga tumaoti o loo tauaveina ni konekarate mai le Malo mo le faatinoina o auaunaga i mataupu tau le soifua maloloina.
Ou te fia faafetai i nei faalapotopotoga mo galuega lelei o loo faatinoina mo tatou tagata Pasefika i lea itu o Niu Sila. Ou te talitonu e le faigofie la outou auaunaga talu ai lenei Malo ma le tipieseina o tupe sa masani ona avanoa mo le komiuniti ma latou galuega masani.
