Faamatuu se miliona tala mo nonogatupe a le aoga
Ua faaalia e le Tautua Samoa i lana fonotaga faalevaiaso – e tatau i le Malo ona faataatia se tasi le miliona tala mai i le NPF poo le Faalapotopotoga o Taui o Faalavelave Faafuasei mo le amataga o nonogatupe auā pili o aoga a le fanau i Iunivesite.
Faaalia e le Afioga Palusalue Faapo II le Taitai o le Tautua Samoa, ua mae‘a ona fai le faamatalaga a le afioga i le Minisita o Aoga le afioga Magele Mauiliu Magele e lē mafai ona faatino lea tulaga ona na matuā gau ai Niu Sila ina ua faatagaina lea tulaga.
Peitai na ta‘ua e le Minisita Agai o Aoga le afioga Aveau Niko Palamo, e lei taofia le faia e Niu Sila o lenei faiga ona e pau lava le faafitauli o le tuai ona oo atu i totonu o totogi o nei nonogatupe auā e faatali lava se‘i maua le galuega a le tama poo le teine aoga na nono le tupe e totogi ai lona pili aoga.
O le faamatalaga a le Tautua Samoa, e tele tupe o loo maua e le NPF ma le ACC mai i saofaga a tagata faigaluega ma o i tonu e tatau ona silasila le malo e aumai ai le tupe e faatino ai lea faamoemoe ma e toe foi lava i le malo lea seleni e ala i ia faalapotopotoga.
O le Aso Faraile na tea nei na faagata ai pili aoga o le semester poo le vaega muamua o aoaoga a le fanau i le NUS poo le iunivesite aoao o Samoa ma o le faamatalaga a le NUS e lē toe iai se avanoa e tuua i se tasi e lei atoa pe lei totogia foi se pili ae e faagasolo le aso mulimuli e silia i le to‘a afe e lei atoa pe oo atu ni pili i le aoga.
O le faaiuga o le vaiaso sa fono ai le pulega o le iunivesite ona faatoa faalauiloa mai ai lea pe toafia i latou e lei mafai ona toe foi i le NUS ona ua leai se pili ma o le faamatalaga a le Tautua Samoa e matuā leaga lenei faiga mo mātua ma aiga e matuā leai lava se tupe e tagolima ai i le taimi e faagata ai pili aoga ma o le popolega lava lea o le afaina ai o le toatele o fanau, ae o loo tau saili avanoa e faamae‘a ai aoaoga ma ia faafaigofie ai avanoa faigaluega i le lumanai.
“O le tala lava lea a le Malo e faamuamua aoaoga a le fanau, ma e tatau ona silasila i ai i lea tulaga o le saunoaga lea a le taitai o le itu agai.
Faafetai le Tautua i suiga a le Malo…
Ae ua faafetaia e le Tautua Samoa suiga ia ua vaaia i fuafuaga a le Malo e pei ona iai se pepa lea na faalauiloa mai ai se faatonuga a le Kapeneta i le faaiuga o Fepuari, e taofi nisi o faamanuiaga na maua e nisi o faauluuluga ma tagata faigaluega o ofisa a le Malo.
O lenei faatonuga ua aofia ai le taofia o le ave fu‘a o le eletise i nisi o taitai o le Malo i ni sui minisita, nisi o ofisa sili i totonu o matagaluega ma faalapotopotoga a le malo ma le pulega atoa ai nisi o le aufaigaluega a le EPC.
E le gata i lea ua taofi le totogi o inisiua a nisi o ofisa sei vagana ai leoleo, faapea ai ma le taofia o nonogatupe ua maua o loo faia e nisi ofisa o le malo ma o loo tele ina faaaoga e ofisa sili ma ofisa sili lagolago ia tupe. Ua tapa e le Kapeneta le lisi o i latou na faaaoga ma faataga le faia o nonogatupe i totonu o ia ofisa. Ua faamamalu foi taavale e tatau ona faaaoga e faauluuluga o matagaluega ma faalapotopotoga ma le fuafuaga ina ia utu le tele o le penisini e le tagata lava ia ae le o le faamoemoe e utu e le malo.
O nei faiga uma na ta’ua e le Itu Agai ua atagia ai le taumafaiga a le malo ina ia faaitiitia le tupe alu ae ia tau aputiputi ma faasao seleni e faaalu i isi galuega ua manaomia le faatino e le malo ma ua o latou faafetaia ai lea tulaga aua o le mau a le Tautua Samoa o le tele o ia suiga e foliga mai ua faia ona o le tu’itu’i atu pea a le Tautua Samoa.
“Ae pe na fai ia suiga e le Malo ona o se matou fautuaga pe leai foi, ua manino mai le taumafai o le Malo ina ia tuuitiitia le tupe alu,” o se saunoaga lea a le Taitai o le Itu Agai.
