Mataupu faaali i fonotoga i le lalolagi, e faatupu manatu. O faasologa o fono e lua, sa faaaogā rulafono

E lua ni fonotaga tetele ia Oketopa ma le vaiaso na tea nei i ni vaega eseese o le lalolagi. O le fono muamua o le fono a loia ma Patent Attorneys, i JeJu Island, i Korea i Saute.

O le fono lona lua, o le fono a se faalapotopotoga lotu i le lalolagi sa faia lea i le Cayman Islands i tafatafa o Jamaica.

E fia talanoaina ni mea tāua na ou maua mai i nei fono e lua.  E eseese uiga o fonotaga, ae maeu le manaia o le faalogo i manatu sa faaalia o isi tagata mai vaega eseese o le lalolagi, e faatupu manatu fou ma aogā.

E tāua foi ona o le eseese o fono e lua ae tutusa le auga o a latou usu fono.

FONO MUAMUA I KOREA I SAUTE:

O le fono muamua o le fono a loia ma Patent Attorneys, e galulue e puipui aiā tatau a tagata ia latou Intellectual Properties (mea totino mai i le faaaogāina o o latou mafaufau. E lē gata i lea, e faaaogā mafaufauga fou, e faatino ai ni mea aogā. Sa fai i JeJu i Korea i Saute lea fonotaga a loia e faapitoa latou faailoga, e puipui ai aiā tatau i vaega o tulafono i totonu o atunuu faapea ma tulafono a le lalolagi e puipui ai mataupu faapea. E 1,500 le au usufono mai atunuu eseese o le lalolagi sa auai i lea fonotaga i Korea i Saute.

E lua vaega ou te ta‘ua ai lenei fonotaga. Muamua, e ui i le eseese o gagana mai atunuu eseese, ae ese le manaia o fonotaga e fai i luga o auala malamalama ma faatulafonoina.  E leai se isi e fesili ituaiga fesili ia e fai soo e tatou Samoa e faapea – O ai oe e te tautala ai i le mataupu lea? O le ā lau feau e te tautala ai?

O loia uma ma Patent Attorneys mai i le lalolagi e 1,500, e faalogo, e leai se pisa. Na o le faalologo i mataupu o faasoa mai e sui i atunuu taitasi. Ona tuu mai lea i le aufono e latou e ta‘ita‘ia fono, le taimi e fesili ai. E lē tau faatonuina mai ni ituaiga fesili e talia ma fesili e lē talia.  E tasi le auga a le aufono a loia faapitoa i lea vaega tāua o le tulafono, o le faalologa i ni mea fou e sau i pepa a usufono, a lea atunuu ma lea atunuu; ma tusi i lalo notes pe faamau foi i lau computer mafaufauga faaalia. O le fesili i lo‘u mafaufau,  pe a faapefea ona aogā lea tala faaalia mo a‘u i la‘u galuega pe a ou foi mai i Niu Sila.

O le vaega lea o le tulafono e toalaiti tagata Pasefika e oo atu i ai se malamalama tele.  E seāseā faaaogāina e tatou tagata Pasefika. E tele ina faaaogā e Saina, papalagi ma isi atunuu i fafo.

O le tele o tagata mau tupe i le lalolagi o tagata e faaaogā o latou mafaufau (intellectual property) e fau ai ideas e faaaogā e fai ai ni mea fou, e lei faia muamua e se isi. E amata i mea iti ae faatau a latou Ideas poo Expression of Ideas, e kamupani tetele, mo ni tupe tetele.

O se faataitaiga, o se Saina e toatasi i Hong Kong o loo galue ai ia le matou loia i Niu Sila, o Colin Woodroffe, Patent Attorney ma loia.  E fai atu i Aukilani galuega a le client i Hong Kong. O lea Saina sa iai lona manatu e tatau ona iai ni mea pu‘eata e faigofie ona faaaogā i lalo o le sami, e latou te maulu i le sami. Ua fiu lenei Saina e sue se mea pu‘eata e faigofie ona faaaogā, ma ia iai sona ‘fale’ (house for the camera underwater), ae lē maua i le lalolagi le mea e manao ai. Na galue lenei Saina i ni tausaga i lona fale taavale e fau se mea pu‘eata e faigofie ona faaaogā e pu‘e ai ata i lalo o le sami, ma iai se fale e puipui ai i lalo o le sami le mea pu‘eata.

O lenei ua puipui galuega a lenei Saina i le tulafono (Intellectual Property Rights using Patents Laws). Pagā lea, e toatasi le tagata na iai i lona iloa se mea e tatau ona faaaogā e faafaigofie ai se galuega pu‘e ata, ae leai se mea na ia maua i faleoloa. Alu loa ia amata ona mafaufau ma tuu ana Ideas i lalo e puipui i le tulafono.  E lē gata i lea, sa ia faaaogā ana Ideas e faatino ai ona fai se auala e puipui ai mea pu‘eata e faaaogā i lalo o le sami e faigofie ona faaaogā. Ona o le tele o mea fou ua maua i le faatino o Ideas a lenei Saina, e lei faia muamua e se isi, a faatau ia Ideas, faapea ma le faatinoina o Ideas a lenei tagata e toatasi, e tele naunau sana tupe e maua mai ai i fua o ana galuega.

O vaega faapea o le tulafono, e faasoa i fonotaga inventions poo Ideas e fetufaai ai loia e iai faailoga faapitoa i vaega ia o le tulafono, pe a faatasi i fonotaga e faia faatasi i le tausaga. Sa amata ona ou auai i nei fonotaga i le 1983, ma ua vaaia i nei tausaga e tele ni suiga o vaega e puipuia i lalo o nei tulafono, i totonu o atunuu ma tulafono a le lalolagi.

E eseese gagana uma a i latou e usufono, ae faaaogā le English e fai ai fono.  E amata ma faai‘u i le fiafia, ma ta te sau ma lota agaga ua faafou lota naunau e faigaluega i ia vaega o le tulafono.

O nei fonotaga e talanoa ma le feavaai (professional) talanoaga uma. A tautala se toatasi, e na o le faalologo o le ‘au fono, se‘i oo i le taimi o fesili.

O le taimi o fesili, e faasino tonu lava le fesili i le mataupu o loo talanoaina.  E leai se maa e togifuaina ma fesilia le aiā a le tagata o loo faaali le manatu.

O le fono lona lua lea na ou foi mai ai i le vaiaso nei, o le fono i mataupu tau lotu. O tagata uma sa auai o tagata Kerisiano mai vaega eseese o le lalolagi ma e eseese foi gagana. O le fono lea sa fai i Cayman Islands, i tafatafa o Jamaica.

E telē le eseesega sa ou vaaia i nei fono e lua.

Ona e iai sui o isi atu Pasefika i le fono lona lua. Ae pagā lea e tele ina leai ni manatu e faaali e tagata Pasefika. Pei e manaia ona faamanatu tiute o ē e o i fono, e faaali manatu i totonu o fono ma le lē fefe.  E tatau ona mafua i tagata Kerisiano ona faaaloalo le isi i le isi ma fai le mea sa‘o. Ae o le tele o taimi e foliga mai e pau lava sui na faaali manatu o sui papalagi mai Europa ma sui o Aferika.  Sa faaali manatu o sui mai Apia ma Pago Pago i mataupu na talanoaina. O le eseesega o fono e lua e pei e fefe tagata lotu e tautatala, i tei ua itagia i latou e isi sui usufono.  E lē faapena le fono muamua lea na ta‘ua i luga.

O le aso lona lua o le fono sa ou faitauina le tusi mai le Tusi Paia mai le tusi o Sapakuka (Habakkuk). Atonu na fai mai le faifeau na taitaia le sauniga ou te faitauina le Sapakuka ona o lo‘u fesili soo i le aso muamua o le fono. A lē fesili e lē malamalama, ma leai ni manatu fou e maua.  E lē o se agasala le fesili, ae ia faatino le fesili i le mataupu o talanoaina.

Pe iai ea se auala e mafai ai ona oo tatou i ni tulaga pei ona ta‘ua i luga i le fonotaga muamua ma le fonotaga lona lua?

Manatua le tāua o le faaaogā o o tatou ola e mafaufau ai i ni mea fou e mafai ona puipui i le tulafono e maua ai se tatou tamaoaiga.