Matau pea suiga o le tau i Samoa – ua sao mai ia Renee

Na matua faalauiloa le tapunia o pisinisi ma kamupani tumaoti aemaise o le afa aso o tagata faigaluega a le Malo ma vave tuua ai ma aoga uma i Samoa i le Aso Faraile (taimi Samoa) ona o lapataiga o matagi malolosi ma le afā o Renee na amata lava ona talanoaina i le po o le Aso Tofi.
O le afā lona fa lea sa iai le matau e ono afea Samoa i totonu lava o le masina na tea nei agai mai ia Fepuari. Na toe faalogoina le sailini a le Fuimu e pei ona faailo ai le tatau i tagata uma sa i le talafatai o Apia ona o ese i le ta ai o le 12 i le aoauli.
E ta ane le lima ua le toe mapu mai foi faasilasilaga faalauaiteele i suiga o le tau.
O le taulaga o Apia ua faalogoina le leo o ili afi a o taumafai aiga o loo iai laau tetele i autafa ane o maota ma laoa, e tatuu i lalo le tele o laau o loo falala solo lala o ia laau ma ono aafia ai le soifua i ia faalavelave faalenatura.
E lei umi ona vaaia le lagi lelei o le taulaga o Apia – ua gaogao foi le taulaga a o pisi solo le atunuu e fai faatauga o maa moli uila, moli ga‘o ma isi oloa ua tolaulau mai le tatau ona faatau aua le ono oo mai ai o se afā ae faasolo mai loa ripoti i Savaii i le louloua o le tau, i timuga na aafia ai le tele o vaega aemaise i le itu Salega ma le itu o Asau.
Ona pau lava faamatalaga o le siisii pea o le malosi o le agi a le tuaoloa.
Na faaauau le femoumouai o le tau ona ua iai le taimi ua vaaia ai le aasa mai o le la mo sina afa itula ae faafuaseia le toto mai o timuga ma na sosoo loa timuga i le afiafi amata loa ona vaaia le agai o le toatele i aiga – i latou na totoe ai i le taulaga i lea taimi.
O lapataiga na faapea mai e nofo sauni le motu tele i Salafai faapea le Atu Aleipata ae oo atu i le 8 i le po ua aafia uma Upolu pe a faaauau ai le agi a Renee.
O le Atu Aleipata na faatoa ola lana eletise i le lata i le 10 i le po o le Aso Faraile ina ua tau fai ifo matagi na oo atu i le 45 maila i le itula i lea itu o le atunuu.
O Amerika Samoa na maualuga atu le matau a tagata o le motu o Aunuu e pei ona taua e le susuga i le faafeagaiga o lea motu i autafa lava o Tutuila le susuga Samuelu Tuilaepa na agai uma aiga i le malumalu ina ua oo atu lava i le 65 maila i le itula le malosi o matagi na faalogoina i lea nofoaga.
O le ta o le 10 i le po na tetele ai timuga i Upolu ma faalauiloa mai ai loa lapataiga o matagi malolosi. O le toatele na faatalitali lava seia oo i le 12 i le po i le tau matau pea o le suiga e ono oo i ai le malosi o matagi ma o le malosi lava lea na molimauina i le 2 i le 3 i le vaveao o le Aso Toonai ae o le tele lava o laau e lei afaina sei vagana ai nai lala o laau na toulu.
Na lapataia Savaii e ono oo atu Renee i le va o le 6 i le taeao o le Aso Toonai ma le 12 i le aoauli. Ae e oo mai i le taimi o le tatou lipoti ua amata foi ona vaaia uiga fesuisuiai o le tau e pei o le toto faatautau mai o le timu, maui atu ae vaaia le vevela o le la.
O le fautuaga a le vaaitau, ina ia taumafai pea e tumau ai i le nofo sauniuni ae e foliga mai ua pasi atu foi Renee e aunoa ma ni manu‘a o Samoa mai i lana agi i le vaveao.
O timuga foi ua maui atu ma ua le mamafa tele pe a toulu. O le Aso Toonai foi ua taofia ai le tele o taaloga na fuafuaina.
Ona pau lava le taaloga na matauina i Savalalo i le po o le Aso Faraile a o sosoo mai lapataiga a le vaaitau, o le Bingo a Tina. E foliga mai e lei iai se manatu o tina e oo le afā o Renee e pei ona taofia ai galuega ma aoaoga o le Aso Faraile.
O le tatalo a le atunuu e pei ona fefaasoaai ai i luga o le ea ina ia faaauau ai le sao mai o Samoa mai i afā, le lona fa lenei ia Renee.
O loo matau pea le tulaga o iai taaviliga o matagi aemaise o timuga i alia‘e mai foi se isi afā i se aso o lenei vaiaso.