O le amata o aoga i lenei tausaga ua faamautu ai se suiga i vasega a le Kolisi a le Ekalesia a Iesu Keriso o le Au Paia o Aso e Gata ai (CCWS) e pei ona ua amata ai nei lana Vasega 14.
O se suiga o le a faamauina i le talafaasolopito o atinae tau aoaoga i Samoa, ona o le taimi muamua lenei o le a iai se vasega 14 poo le Form 7 i totonu o se aoga maualuga poo se kolisi foi.
O le vaiaso lenei ua faamautu ai loa galuega faaiu a o lei amata vasega i lalo o le polokalame mo alii ma tamaitai e tusa ma le to‘a 40. O i latou nei na aoaoina uma i le Kolisi o Pesega i le Vasega 13 i le tausaga na tea nei, ae o isi ua amata le Vasega faavae (Foundation Year) i Lepapaigalagala lea ua mautu ai le Vasega 14 lea e tasi mo isi fanau uma a le atunuu.
O fuafuaga alualu mamao a le Malo e pei ona mae‘a faalauiloa ua aofia ai le faaopoopo o le Vasega lenei 14 i totonu o Kolisi maualuluga i le atunuu, e pei ona vaaia nei le amatamea ai o le Kolisi lenei a le Ekalesia a Iesu Keriso o le au Paia o Aso e Gata ai.
Sa talosagaina e le Aoga le fesoasoani a le Nofoaga Tutotonu mo Aoaoga faavae i Fiti latou te faatautaia uma mataupu ma le faatinoga o lenei polokalame, lea e aofia ai ma le aoaoina o faiaoga e faatautaia vasega ma mataupu moomia mo lenei polokalame.
Ua tutusa ai nei ma le polokalame o le vasega faavae poo le vasega e sauni ai mo aoaoga faa Iunivesite.
Faaalia e le Faatonu o lenei polokalame mai i Fiti, e mo se seleni laititi ua mafai ona o latou ofoina i lenei polokalame e pei ona talosagaina e le Kolisi a Pesega ma le mautinoa e tamau i faigafaavae ma polokalame o le vasega faaopoopo lenei ua faatino uma mai lava galuega i le latou ofisa i Fiti. Sa fesiligia Susan Sela pe iai se eseesega o le suiga lea ua amata nei e le Kolisi a Pesega ma le UPY lea e aooga ai le toatele i le polokalame lenei, ae na ia ta‘ua o le suiga tele lava o le tupe e mafai ona faaalu ai e mātua mo aoga a le fanau.
O le taimi lenei i Iunivesite o loo aoaoina ai le vasega faavae (Foundation Year) e tusa ma le $230 tala e alu i le mataupu e tasi, ae o le faamautu ai o le polokalame i totonu o Kolisi e oo atu lava le pa‘ū o le tau o le mataupu e tasi i le $60.
Na faaalia le fiafia tele o tama ma teine aoga ina ua fesiligia i le suiga ua iai ma o le faamatalaga ua mafai ai ona faaauau sa‘o mai i le vasega13 ma faamae‘a ai a latou taumafaiga e aunoa ma le tuua o le Kolisi.
O lona uiga foi e mafai ona agai sa‘o lava i avanoa i Iunivesite mai i le Kolisi e aunoa ma le toe tau saili o avanoa i vasega faavae Foundation Year) i Iunivesite i totonu o le atunuu.
O le faamatalaga a le aoga, o vaega lava nei o ana fuafuaga e ta‘i lima tausaga ma faatino ma o se suiga ua manatu ua talafeagai mo le laalaa i luma o taumafaiga faaleaoaoga a le fanau. O le a faapea ona vaavaai mai i Fiti le amataga o lenei taumafaiga.
