Ua aumai le tala autu o le Tupe a le Malo Ausetalia mo ana galuega faataoto mo le tausaga faaletupe 2012 i le 2013, ua faasafua mai ai ma se vaegatupe ua maualuga lona aofaiga e fesoasoani ai i fuafuaga o le atina‘e o le tamaoaiga o Samoa.
E $102 miliona tala tupe Samoa lea vaegatupe ma ua siitia ai ile 8 pasene fesoasoani a lea Malo mo lo tatou atunuu.
O sootaga mafanafana i le va o Ausetalia ma Samoa ua tele tausaga o faatumauina pea.
O lea foi Malo o loo sili ona latalata mai ia Samoa e ese mai le Malo o Saina o loo molimauina foi le sasaa mai o lana ato tupe mafiafia e fesoasoani ai i lo tatou Malo ma ana galuega fai.
Pe a tuu i le tulaga aoao tetele o sootaga faavaomalo o le Pasefika, o Samoa o loo sili ona malosi lona lelei i mataupu e aafia ai le lotoifale o pulega lelei aemaise lava le mataupu i le atunuu tuaoi o Fiti.
O le taitai o lo tatou malo i le alii Palemia o loo ia faafetauiina pea pulega solitulafono a le taitai‘au o Fiti o Bainimarama, ona o se gaioiga na faia e lea taitai o le fitafita e aveesea faamalosi ai taitai o Fiti na filifilia e tagata lautele e ala i faigapalota a lea atunuu ua mavae.
Tasi lea o tulaga o loo manatu nisi o le au faimafaufau i mataupu tau upufai o malo poo polokiki, o loo mafua ai ona faaaloalogia Samoa e taitai o isi Malo o le Pasefika aemaise lava Niu Sila ma Ausetalia, ma saga solo mai ai pea le mau foai e fesoasoani i galuega o le atina‘e o le tamaoaiga o le atunu.
O le $102 miliona ua faatatauina e Ausetalia o le a tuusa‘o i fuafuaga o le atina‘e i le itu i le soifua maloloina.
O le a faatino ai polokalame e faasagatau atu ai i faama‘i lē pipisi e pei ona maualuga le siitia o le aofai o tagata o le atunuu e aafia i le tino puta, le gasegase o le suka ma le toto maualuga faapea gasegase o le fatu, ma fatuga‘o poo kidney failure.
O isi vaega o le a ave i ai le tupe o polokalame mo le faaiitiitia o le ola mativa i Samoa ma e faaauala lea i aoaoga ma atina‘e e unaia ai tagata e faia faatoaga, ma pisinisi laiti e saofaga i ai tagata e maua ai le silafia ma le tomai i atina‘e e fesoasoani ia latou tupe maua aua fuafuaga a le aiga.
O le itu i aoaoga le isi atina‘e o loo aofia i le fesoasoani faatasi ai ma taumafaiga e ausia ai i totonu o pulega a le Malo taiala ma manulauti o pulega malo lelei.
E le tau fesiligia le faafetaia e le Malo o Samoa o lenei foai aua o se faamama avega i le faasoasoaina o tupe maua mo taumafaiga eseese o le atina‘e o le atunuu ina ia lelei lona tamaoaiga.
