O le vevesi ma le vavaô o tagata lautele i le fia maimoaina o le taaloga a le Queensland Reds ma le Crusaders, na matuai faamalieina ai Brisbane ma Ausetalia atoa aemaise foi se vaega o Niu Sila ona o nisi o tama taaalo a le Kiwi.
Ou te talitonu ana faapea e lagona atu le feei mai o le aumaimoa ma le au tapua’i i maota ma laoa ma vaega uma sa maimoaina ai le taaloga, ai a se manaia auâ pei a e laufalî tagata uma i le taumanuô “Se pasi le polo” pe faapea foi “Seki a oe Quade Cooper” aemaise a la i le vaega mai Hamo le malo pipo e pei ona lausilafia, e tapuai fiafia.
Na amataina le taaloga i le va o le Queensland Reds ma le Crusaders i le toe kuata i le 9 i le Aso Faraile na tea nei, lea sa faatumulia ai le Suncorp Stadium.
Saunoa le kapeteni o le Queensland Reds le alii o James Horwill, e ui lava ina manu’a tugâ i lona tuli peitai ua matuai taofia lava le gugulu ma le tele o faamatalaga na tuia ai i latou, talu le malolo i le la taaloga ma NSW Waratahs i le isi vaiaso ua tuanai.
O le alii Kiwi o loo taalo i le Reds le numera 10 o Quade Cooper na matuai mataalia lana taalo i lea taaloga.
Na ova lana kiki i le uluai sala a Crusaders ma faapea foi ona maua lana sikoa muamua na avea lea ma ala na pei ai o le peapea le alu o lana momoe seia oo lava ina maua le isi ana sikoa mulimuli lea na ia faaleleina ai le polo ma fa’alo mai i le au maimoa i le ova tele o lona fiafia.
O isi sikoa mataina o le alii o Digby Ioane le uigi saosaoa faapea le alii o Rod Davies lea na ia faatepa le aumaimoa i le mamao o le vaega na motu atu ai ma le polo ma sikoa loa ae tau fai pati le aofia.
E lei tuumamâina foi e le Crusaders aua na finau uma ‘au e lua peitai e le mua uma ni vaa, e tatau lava ona malo le moa fanua i la lea foi taimi.
