O fanau o le lumanai manuia ia o aiga, nuu, faapea le galuega a le Atua. O le pulunaunau foi lea o le loto o se tasi o alo o le atunuu ua faameaalofaina e le Atua i musika aemaise le tusiaina o pese, le susuga ia Poulima Salima ina ia tufa le taleni ma le meaalofa mo fanau o le Pasefika, o le mafuaaga lea o lona faia o se aoga tapiano e faasoa ai lona iloa mo tupulaga.
O le Ekalesia Metotisi i Mt Albert sa faia ai se faaaliga tapiano a i latou ua mafai ona taina lesona e pei ona aooga ai. E toa sefulufitu i latou sa faaali le taleni e amata mai i le fitu tausaga e oo atu i le sefulua tausaga.
Na faamalieina le faafofoga ma le silasila a mātua ia latou fanau i le tele o le iloa ma le malamalama ua latou maua. O se tasi vaaiga na maofa ai le mamalu o le atunuu o fanau ua mafai ona taina le piano ma usu le pese, e lē gata i pese faasalemausau a o pese ua faaaogā mo viiga o le Atua.
O lenei aoga o loo fefiloi i Samoa ma palagi. Na faaalia e le susuga ia Poulima, ua tasi nei le tausaga talu ona faigaluega tumau mo lana aoga. E amata atu i le fitu tausaga agai i luga i le au matutua o loo faaaogāina lenei avanoa. Na saunoa foi ua valusefulu pasene nei le toatele o i latou ua faatonu atu ae lē tele ni avanoa o iai.
O lana aoga o loo faia i Waterview i aso taitasi e amata i le ‘afa o le tolu i le afiafi ae uma i le iva i le po, e ‘afa itula e faia ai lesona a le tamaititi. O le susuga ia Poulima e mai le alalafaga o Safotu ma Faleasiu.
