Mataina kirikiti a tamaitai – Sports Pasefika 2014

O se tasi lenei o taumafai poo polokalame i le toe fafaguina mai lea o le taaloga o le Kirikiti i totonu lava o Niu Sila nei. Ua lē faapitoa i le itupa o alii, ae ua faapea foi ona tapena foi i ai mo tamaitai. Na saunoa le Faauluuluga o lenei taamilosaga ia Satele Tupe Taisalika lona agaga fiafia e faafetaia le lagolago a le lautele i le toe fafaguina mai lea o lea taaloga a Samoa.

 

O le autu moni lea na faavaeina ai le Sports Pasefika ina ia lē gata o le faatumauina o lea taaloga a Samoa, ae ia aogā foi e faafailele ai lenei taaloga mo le lumanai mo auga tupulaga fou lea o loo fai a‘e i lenei foi tausaga. Na uluai faavaeina lenei faalapotoptoga i le tausaga 2012, ma e tolu ni taamilosaga tetele lava o loo faagasolo e le Sports Pasefika i tausaga taitasi, o loo aafia ai le “The Challengers Cup” , o le The Pasefika The Pacific Shields, faatasi ai ma le taamilosaga ua faaigoaina  “The Champions Cup”.

 
O loo molimauina i tausaga uma talu ona faavae ia taamilosaga, o loo agaigai pea i luma. I le tausaga nei foi o loo iai le talitonuga ina ia siitia se faatinoga lelei i lenei foi tausaga. O loo faatāua foi e le Sports Pasefika isi taamilosaga o loo faagasoloi i le taimi nei, o le ala lea foi lea o loo tapena ai ana taamilosaga ina ua mae‘a lelei isi taamilosaga o loo faagasolo pea i tausaga uma. O loo taulai atu nei le auaunaga ina ia aafia isi taaloga e pei o le Volipolo, o le Taitoafitu ma le tele o isi taaloga. O se vaaiga lenei i taaloga sa faia i le faaiuga o le vaiaso na se‘i mavae atu nei.

Sports Pasefika Woman’s Challengers Cup Results
Archibald Park, Kelston 15.02.2014
Glen Innes Catholic Youth    4 wins,     0 losses
Black Widows    3 wins,     1 loss
Angels    2 wins,     2 losses
Riversdale Uso    1 win,     3 losses
Oratia Girls    0 win,     4 losses

O le autalavou a Glen Innes Catholic Youth na manumalo i le tausaga ua mavae, lea foi ua toe faamanuiaina i lenei foi tausaga 2014. O loo faamoemoe e amata le taamilosaga a alii i le aso 8 o Mati 2014.

Glen Innes Catholic Youth - winners of the Challengers Cup 2014 . Black Widows - runners up in the Challengers Cup 2014 .