O lenei Sosaiete na uluai faafaileleina i le 2003, ae faato‘ā tatalaina aloaia i le 2004, i le Deep Water Motor Club.
O sui faavae na saili malo, o ni tamalii ma ni tamaitai e lausilafia e le atunuu i Ausetalia ona o le galulue punouai e tautuaina atina‘e eseese, aemaise foi taleni a le fanau. Le afioga i le Peresitene Alalatoa Emani, le alii siufofoga lelei ma le tausaafia.
O le isi alo o Samoa ua faapea ona taulamua foi i nisi o polokalame le Susuga ia Avon Lealiie‘e. O le tamaitai o Aliitaeao Uati, Ata Ulupuao Mauai, Eric Sparks ma Garrie Sparks (fai i lagi lana folauga).
O le po o le Aso Toonai, na amata aloaia a latou polokalame mo le faailogaina o le 49 tausaga o lo tatou tutoatasi, e ala lea i le siva tele poo le ball, na faataunuuina i le Fontana Lounge, Bankstown.
Na taitaiina le sauniga e le susuga ia Pastor Ativale, faafeagaiga mālōlō manumalo, i viiga ma le faafetai i le Atua. O le talaaga o Samoa, na saunia e Rev Alan Filipaina, ma o ia foi na faaiuina le po i le tatalo ma usuina ai le vii o si o tatou atunuu.
O isi foi malo faaaloalogia le afioga Patele Pa‘ulino, ma Rev Iosua Vili. Na auai foi sui o le Premier, faapea Sui o le Palemene, Brian Doyle mai Campbelltown ma Glen Brooks mai East Hills.
E lē gata i lea ae o le mamalu lasilasi i tupu ma ee o le atunuu, o le aufaipisinisi ma le lagolagosua mai a aiga uo ma ē masani. O le uluai tausaga lenei, ua mafai ai e se faalapotopotoga Samoa, ona faatautaia se polokalame o le Tutoatasi mo ni aso se tolu. O le P.C.Y.C i Minto, le nofoaga e faia ai.
O le Aso Toonai 11 e amata ai tauvaga volipolo e tuufaatasia alii ma tamaitai i le au e tasi (mixed volleyball). E faia foi le maketi e faatau ai lavalava, o mea taulima, ma faleaiga soo se taumafa eseese.
O le Aso Sa, e faapitoa mo le tupulaga, e ala lea i koneseti faaevagelia. E maua ai foi ma maketi auā oloa eseese. O le Aso Gafua e faaiu ai polokalame o le tutoatasi, i finals o le volipolo. E faia ai foi tauvaga pese, o loo lagolagoina e le kamupani tele a le JB Hi FI. E maua faailoga o le volipolo, e ta o le $100.00 e faaulu ai lau au, ae e maua ni faailoga tupe, o le manumalo, lona lua ma le lona tolu.
O le Susuga ia Avon Lealiie‘e, o loo faauluulu i ai polokalame o aso nei e tolu, ae opogi faatasi e le Pacific Development, i lalo o le faamalumaluga a La‘u Samoa Society. O le komiti faafoe o loo taitaia pe faatautaia le La‘u Samoa Society, Peresitene: Alalatoa Emani Alalatoa, Sui Peresitene: Toomata Tauo Toomata, Failautisi: Peala Manase, Teutupe: Aliitaeao Uati, Public Oficer: Leuluaialii Agnes Passi ma le Consultant: Toleafoa Tonumaipe‘a.
