Matagofie Lotu tamaiti i Sini

O le Aso Sa ua faapitoa mo le fanau, e matauina ai le feilafi o laei papae o le fanau i Ekalesia eseese na faataunuuina ai sauniga o le Lotu a tamaiti i Sini.
O le Ekalesia EFKS faapea le Ekalesia Metotisi sa molimauina ai le mau tala mai le Tusi Paia na faatinoina ai tauloto ma Tala faaevagalia i se aso na Laugaina ai foi ma taitai lava e le Fanau sauniga a o tapuai mātua ma ekalesia.
O pulega e lua a le EFKS o loo faauluulu i le toeaina Faatonu ia Rev Elder Toese Peleti Toailoa ma le faletua ia Senetenari aemaise le isi pulega o loo faamatua i le toeaina ia Rev Taipo Malifa ma le faletua ia Sitaua, na sii taulaga faatasi e ala i sauniga a le fanau. E faapea foi le afioga i le Sea o le Sinoti Rev Savaii Lotu ma le faletua ia Perise.
E pei o masani mai Samoa, o nisi o tapenaga a mātua na amata i le lua masina a o loma le faamoemoe e ala i aoga tauloto i maota o galuega ma malumalu. Sosoo mai ai ma le tapenaina o ofu ma laei o le fanau lea e amata mai nisi o aiga e toatasi le alo seia oo atu i le toatele.
Na molimauina i tapenaga le faasoa atu i fanauiti o loo soifua ma sa fananau i Sini nei lo latou pueina ma malamalama i itu na sau ai foi nai o latou mātua mai Samoa a o lei malaga mai i fafo.
E lē gata o tapenaga i tauloto ma ofu ae faapea foi i toonai lea e tautua ai e tamā ma tina le fanau i le mae‘a o lo latou tapenaina o sauniga e ala i tauloto ma tala faapea viiga  o le Aso Sa Paepae.
E lē gata o le galulue faatasi o aiga uma ma le Ekalesia i le faamatagofieiina o le Aso faapitoa ua fai lea ma auala e faaolaola ai pea la tatou gagana Samoa i le fanau o loo soifua ane i Ausetalia. O le taiala lea e pei o le faitauina o le Tusi Paia, pese ma viiga aemaise le faamatalaina o Tala faaevagalia lea e faaolaola ai pea lo latou malamalama i le faasamoa.
Na momoli foi le faafetai a Susuga i faafeagaiga ma faletua aemaise mātua ma Ekalesia i tapenaga matagofie a fanau aemaise le faamanuia masani mai le fanau, “Ia manuia outou mātua ae ola i matou le fanau, Soifua.”