“Afai e te iloa a‘u i Siulepa, ou te iloa foi oe i Togamau”.
O nisi nei o faitau e ese le moni ma le faamaoni, o le taui lea o le alofa i le alofa. Se mea foi ina a matagofie, o uso ae nonofo faatasi ma fealofani.
Soo se faamoemoe lava e tapena ma saunia lelei, e lē gata o le aulelei, matagofie ae o le maopoopo, o le vaega sili lea ona tāua. Ua lē gata ina fiafia tagata uma, malie atoatoa o le ‘au fāi mai ona o le felanulanuai o le laualo o le vaega lea e teuteua le mea atoa.
O le tauafiafi o le 2010, o se tuufaatasiga lea i se fiafia poo ‘aiga afiafi e fiafia ai le Mafutaga a Tina EFKS Ipswitch ma aiga, uo ma ē masani a o tau gagaifo le la o lenei tausaga. O lea faamoemoe sa faataunuuina i le Aso Toonai, aso 21 o Novema.
O le aitu lauiloa mai Samoa o Molioo Sumeo sa aami mamao mai na te faatautaia le po atoa.
Na maua se fafatala a se tasi o toeaina o faapea, e o mai lava tama matutua e uga‘i mai a le faamatalaga e ne‘e ai le ‘ata latou, auā e fai lava ma faaoso tala malie a le tama o Meo.
O le tele o siva Samoa ma le valevalealofa sa tauaao i ai le paia i Ekalesia ma faafeagaiga aemaise toeaiina, aiga ma uo faapea nisi ekalesia sa fuai fai mai, ona o se sailiga foi o se sao o le Mafutaga a Tina auā le mauga o le Atua lea ua amata ona tapena.
Mo le silafia o lea ua mae‘a ona mautu le nofoaga sa tapuai ai le ekalesia, peitai o lea ua agai atu i le fauina o se malu tapuai ma se maota o le faafeagaiga ona ua tupu ma ola le galuega, ma ua tele foi matafale. O le ekalesia lea o loo tausia e le susuga i le Toeaina Faatonu a le EFKS Kuiniselani ia Rev Kerita ma le faletua ia Binary Reupena.
E leai se isi na ‘alo tamala pe faatafa i le tapenaina o le faamoemoe, ma ou te talitonu e tusa pe o le ā le telē o le hall sa faia ai le faamoemoe, ae na tau lē ofi i le anoanoai o tagata sa lagolagoina le faatalauula mai a le Mafutaga a Tina EFKS Ipswitch, ae na sili ai ona lagona i tino matagi lelei i le lagolago a nisi o ekalesia mai isi tovine.
O se po na molimauina foliga sagisagi fiafia o faafeagaiga ma faletua faapea le auvalaaulia i le faaaogāina o le dance floor ona o le logomalie o le faaili a le Upec, le susuga ia Matano ma le vaega.
Na matuai faamalieina atoatoa finagalo i lea po e lē gata o le seleni sa tauaaoina, ae o le lava o le faamalositino na leai ai lava se isi e fia tumuli ina ua tau lata ina faatofā mai le faaili ma le aitu mai Samoa o Molioo Sumeo.
Ua iai le faamoemoe o le masina o Aperia i le tausaga fou 2011, o le a faaulufaleina ai lea galuega tele, o le ‘olo o le Atua faapea le maota o le faafeagaiga poo le toeaina.
