Matagofie le sailiga seleni a le afioaga o Toamua

O le faigamalaga mai Toamua Faleata, o loo i Aotearoa nei, ma o le komiti lava lea o le afioaga mo le faamoemoe. Ua tuua aiga ma le nuu ona o le sailiga lava aua le atinaeina o le afioaga, aua se lelei mo le agai i luma.
Sa faimalaga i Ueligitone i le vaiaso ua mavae, ma fai ai sa latou faafiafiaga. Na faatumulia i le toatele o alo ma tamafanau sa lagolagoina, faapea foi le atunuu ia i latou ua masani e atiae mea sili mo le afioaga.
O i latou ua malaga mai e aafia ma tofia aloaia e le afioaga, e fai ma komiti mo le atinaeina o le nuu.
O le paia ma le mamalu ia Ale ma Ulu ma o la aiga, le Gafa o A’atoe ma Satunumafono ma le Vaaulu. Ma o le faigofie o auala o fesootaiga o lenei faamoemoe o alo lava o le nuu, sa lagolago ma talisapaia i soo se auala. Pei o tama tuai o le Tiamaa, o loo ua aumau ma alaala i Aotearoa nei.
Ua maea foi se fiafia sa faia i le Paradise Club, sa tumutumu ma faatumulia i le atunuu, aemaise o alo ma fanau a le afioaga. O le fesoasoani a Pagamalie Iopu Faivalu, le Susuga ia Lenni Mamea, sa siva ailao, o lana taleni o le faaaogaina o le sapelu (vaeane le atunuu).
Sa matautia le matagofie o lea po, leai se mea e faaletonu.
O le faamoemoe o lea toe sauni atu le faigamalaga i le atunuu i le vaiaso fou.