E uigaese le manaia ma le matagofie o le tulaga ua iai nei le falelotu o le maota faasausau o le kamupani a Ligaliga Funeral Services i Magele, e pei ona toe teuteu ma toe faaleleia ai.
E ui i le tulaga faaletonu o le tamaoaiga o le lalolagi, na aafia ai foi ma Niu Sila i le tulaga o seleni ma tupe maua. Ae peitai e lei mafai ona aveesea ai le mau tauave ma le naunautaiga o le kamupani, ina ia faaleleia atili le nofoaga o loo agai atu i ai le mamalu o le atunuu ma tagata lautele mo le faaaogāina i taimi e manaomia ai.
O le toe faafouina o le maota mo sauniga o maliu, o se vaega o fuafuaga a le kamupani ua leva ona faataatia mai, ae sa tulimatia pea ma silasila toto‘a i se taimi ma se aso tonu e faataunuuina ai.
Ua tusa nei ma le masina talu ona mae‘a le galuega toe faaleleia, e aofia ai totonu i le vaega o le malumalu mo le agai atu i totonu, ua suia lona maa o loo fola ai e amata atu i le pito i tua seia oo lava i le pito i luma, atoa ai ma le vaega tonu o loo iai le pulelaa.
O le vaega o le puipui i tua faasaga mai i le faapotopotoga, ua mae‘a foi ona toe fai i ai le suiga ma ua matagofie naua i le silasila ma le tagai atu i ai.
Ua mae‘a foi ona faanofoa fou uma nofoa i totonu e alala ai le mamalu o aiga ma ekalesia ma le valaaulia mo taimi o sauniga. E le gata i lea o puipui i ona autafa ua mae‘a foi ona toe faamatagofieina, ma ua avea ai o se nofoaga fou i le vaai ma le silasila.
O se tasi o vaega sili o tāua ua mautu foi ona tapenaina lelei ma ua faia foi i ai se suega, ua mautinoa lona selau pasene, o masini faaleotele leo, atoa ai ma ona totoga i le faatautaia o sauniga ma soo se polokalame e manatu ma finagalo i ai aiga ma tagata lautele mo le faaaogāina.
Sa molimauina e le Samoa Times le tulaga o lenei galuega tele ma le tāua, ua toe fausia ma faaleleia ona o le finagalo o le alii pule ma le pulega o le kamupani, e fia fai mea lelei pea mo le tautuaina o le atunuu.
Saunoa le afioga ia Aii Faapo, o le auaunaga lava na tuu mai e le Atua ia i latou e faaaogā ai lo latou soifua auauna mo le atunuu, o lona uiga foi e tatau ona fai ia mae‘a ma matagofie, ae ia viia ai pea le Atua.
O le fetalaiga ia Lavea Siu ma le faletua ia Kamili, o loo nafa ma le faagaioia o fuafuaga ma le faagasologa o galuega i totonu ma fafo o le kamupani, aemaise o fesootaiga ma uo ma paaga masani mo taimi o faigata ma faanoanoaga.
E le gata i le galuega tele mo le malumalu mo sauniga, ae ua oo lava foi i totonu o le fale atoa, ua mae‘a foi ona faia i ai galuega toe faaleleia, ma ua tele ai lava ma lona suiga ua iai nei.
O loo ua iai foi se tasi vaega o le fale poo le malumalu mo sauniga, e faatatau mo aiga ma isi gagana e fia faia ni vaega faapitoa e uiga ia latou lava tu ma aganuu masani, ina ia vavae ese mai ai i le nofoaga tele ua saunia mo faalapotopotoga toatele.
E silia ma le $168 afe se vaega tupe e pei ona saunoa i ai le pulega, sa toe fausia ai ma toe faafouina le fale atoa ma lona ata fou ua tulai mai ai i le taimi nei. Ua avea ai foi o se avanoa ua faalauiloa ai nisi o auaunaga ma ofo faapitoa a le kamupani mo aiga ma uo e faaaogāina la latou tautua.
O le mau tauave ma le manulauti a le kamupani i lenei vaitaimi e pei ona malilie ma autasi foi i ai, o le faataugofieina lea atoa ai ma le tele o isi fesoasoani ua tuuina mai mo le mamalu o paaga ma aiga e manaomia le fesoasoani.
