Ua tini lau o le faamoemoe ina ua mae‘a le tuufaatasia o le CD pese a tamaitai siufofoga malū ma le matagofie o Barbara ma Antoinette Tuipe‘a e pei ona iai le tatala aloaiaina o le la faamoemoe i le Aso Faraile ua tuanai, i le Malaeola Hall i Mangere.
O le afioga ia Patele Father Enderman na faia le sauniga lotu e faapaia ai le tatalaina o le CD, sosoo ai lea ma le saunoaga autū mai le tamā o tamaitai pepese, a o lei alo i faafiafiaga ma le taumafataga i lea afiafi. O Barbara ma Antoinette o alo e faasino i le afioga Asiava Atonio Tuipe‘a ma le faletua ia Julia Antonina Tuipe‘a, o ni tamaitai talavou na amata pepese mai lava o laiti i laua, ae ua mafai ona tuufaatasia se CD pese.
Pei ona saunoa Asiava, na amata mai lava le taleni pese a nai o la alo i totonu o le falesa, faasolo atu ai lava lea i totonu o aoga ma soo se avanoa lava e mafai ona faaaogā ai le taleni, seia oo lava ina faataunuuina le pueina o lenei CD.
Toatele le mamalu o le atunuu na molimauina ma auai, atoa ai foi ma nisi o le aufaafiafia sa lagolagosua i le faamoemoe, e iai le Embrace Dance Group, Ailao Knifee Dance Crew, Tatau Boys ma nisi alo pepese.
O le CD ua faaigoaina “The singing hearts” Iesu e, ou te talitonu ia te oe, ma e tele ni pese matagofie ma le aogā mo le aiga, le fanau ma soo se tasi o loo iai i totonu o le CD. O se fafagu foi lea ma se faamanatu mo mātua, ia atinae taleni a nai fanau i le tuputupu a‘e. O le a lē gata ai i lea le taumafaiga a Barbara ma Antoinette, ae o le faamoemoe e faaauau pea le taleni e faaaogāina mo le Atua ma lona finagalo i aso o i luma.
