E logo lava i tino matagi lelei, le pai mai ole Upu faauuina a lo tatou Atua, e ala i tapenaga ma polokalame sa alofaiva i ai nai o tatou tamā, mo le faamanatuina o lo latou aso faapitoa..
O lena se lagona na oo ane, a o molimauina le felanulanuai ma le matagofie o tapenaga a nai tamā, mo le faamanatuina o le aso ua faapitoaugafa mo i latou uma, e pei ona iai le Aso Sa na se‘i mavae atu nei.
O le ekalesia a le Samoa Assembly of God i Onehunga, o loo galulue ai le susuga i le faafeagaiga ia Pastor Toomata Sione ma le faletua ia Sieni, sa maua atu i ai se avanoa auā le molimauina o lo latou faamoemoe.
Sa maitauina le lelei tapena ole polokalame a tamā ole ekalesia. E amata mai lava i pesepesega na momoli ai le faafetai ma le viiga i le auga o aute lo tatou Keriso manumalo ona o lana tausiga, seia oo ane i le aitema muamua o lea polokalame o loo faamanatu mai ai e tamā i loto ma agaga o ē uma sa molimauina lea faamoemoe, po ua tusia o tatou igoa i le Tusi o le Ola?
Sa matua sui fefiloi le nanamu faaola totoga o le feau tāua na momoli mai e faaevagelia o lea aso e pei ona tapenaina e le susuga ia Failautusi Tiatia ma tamā uma o le ekalesia, aemaise o le mālie ma le onomea o le faatinoina o nei aitema, e pei o le faaataina mai o le tauvaga a tamaitai lalelei e sue ai se masiofo a le tupu o Asueru seia oo lava i le aitema mulimuli, o loo faamanatu mai ai le loloto ma le maualuga o le alofa o lo tatou Alii o Iesu Keriso i soo se tagata, o loo afifi mai i le meaalofa tāua o lana faaolataga mo i tatou uma.
Sa lei tuu mamaina foi e le tapuaiga a tina o le ekalesia le tapenaga a tamā, auā na faaiuina lea aso i le faaulaina o nai tamā i faasolo suamalie ma le matagofie ona teuteuina aemaise ai o le toonai felanulanuai na tapenaina mo le fofoga taumafa o tamā o le ekalesia ma i latou uma sa molimauina lo latou faamoemoe.
