O le taui o le seleselega, o le tausinioga lea o se faamoemoe e tulimatai i ai ā sa filigā ma saili ma le loto atoa, o lea aso foi e mau ai ē fiafia, mau foi e faanoanoa.
O le afiafi o le Aso Faraile na se‘i mavae atu nei na faia ai se tauaofiaga tele o se taumafataga, ona o le faaiuina o galuega o lenei tausaga e sauna atu ai mo le faauuga lea sa faia i le aso na sosoo ai.
Sa malaga mamao mai lava le team mai Ueligitone e taitaia mai e Timoteo Williams e faafiafiaina le po.
O se taumafataga fiafia lea e feiloai ai aiga ma uo faatasi ai ma faafeagaiga malaga mai soo se atunuu.
E ova atu i le afe i latou na molimauina lea faatasiga tāua ma le matagofie.
O le faauuga sa faataunuuina i le Aso Toonai talu ai ona o le iuga o le seleselega o lenei tausaga.
O le taitai o lea sauniga sa taitaia lea e le pule sili poo le founder, le Susuga ia Dr Peniamina Williams. O le Taitai aoao o le ekalesia o galulue i Melepone, Susuga ia Pastor Onesemo Pulepule, sa lauga faafetai ma faalaeiau e faamalosia ai pea i latou mo le taua o mafaufauga, e ui ina a‘e i mauga ifo i vanu, ae na tali le Atua i taumafaiga.
Na auai mai sui mai Hawaii, Niu Sila, Tutuila, Samoa ma nisi mai Setete o Ausetalia e pei ona auai mai ai foi sui o le malo faafeterale.
E toa 30 le aufaauu, maua uma a latou tikeri ae o se tala fiafia e toatolu na faamanuiaina i sikolasipi, o i latou nei o Ioasa Kepu (Vailima), Mavis Janke (Utualii/Sinamoga) ma le sui faasalalau o le Penina o Asuisui1197am, le susuga ia Terry Filimaea Fauea (Vaiala/Satupaitea).
Sa taualuga i se combine na tuufaatasi ai ekalesia uma a le ekalesia AOG i le Aso Sa na tea nei, ma faamavae atu ai i malo mai Hawaii, Niu Sila, Tutuila, Samoa ma nisi mai isi setete o Ausetalia.
Sa malaga faapitoa mai lava le toa 30 o le aoga a le Agape Bible College mai Sini e lagolago le faamoemoe o nai o latou uso aooga.
O le peresitene o le aoga i Brisbane o loo taitaia lea e le susuga ia Pastor Ferdie ma le faleta ia Susie Janke. O le reisitala o le aoga i Ueligitone sa feagai ma le fofogaina o suafa uma o le aufaauu.
O loifofoga o le fiafia sa vaaia i lea po, auā e moni ai upu e lūlū ma loimata e toe selesele foi ma loimata o le olioli. Faamoemoe o le masina o Fepuari o le a toe a‘e ai le aoga, tele foi nisi ua sauni e ulufale atu e a’otauina i lea aoga, e faalauteleina ai le soifua faaleagaga.
O le susuga ia Dr Ieti Mageo na malaga mai Honolulu Hawaii (founder o le Agape Bible College) sa ia tauaaoina tusipasi o le aufaauu. O se aso matagofie na vaaia ai loifofoga maligi o le olioli ma le agaga fiafia ua tini manuia lau o le faamoemoe.
Sa faaiuina le faauuga i se taumafataga tele na tapenaina e le faleaiga a Uncle Sams Catering le susuga ia Poulava Sam & Lorna Matautia.
