Fai mai le cd pese a le 685 faapea foi le alii o Terence Tiumalu Vol 3, “Seki a seki a oe”. O se tasi foi o mau masani “E laititi ae maini”.
E uma tala ae lē mafai ona uma upu e faamatala ai le matagofie ma le seki o faafiafiaga sa alo atu i ai le autalavou a le Uniting Church a Inala i le afiafi o le Aso Toonai na sei mavae atu nei.
Na amataina i se saunoaga a le faafeagaiga ia Rev Tino Scanlan. A maua le ‘ata ma le fiafia e faigofie foi ona susulu atu ou foliga lalelei e pei ona faatumulia ai le faamoemoe a lea foi autalavou.
O le upu moni o nisi ia sa ō masalosalo, peitai na alalaga le aumaimoa “MORE MORE MORE” ina ua faamalieina tagata uma i le agavaa o tupulaga ia latou taleni ma siva Samoa faapea faleaitu na tatagi faasoloatoa ai le ‘ata a isi loomatutua.
O le laulausiva na matuai pati lima tagata i le vavai o le tino o le alii o Kilisi Lefua sa ia taimiina le pese aemaise le mataalia o le aufaipese ae sili ai ona mālie fatuga, auā e lē o se autalavou toatele ae na vaaia le saunia lelei o tapenaga uma. O le ala foi lea sa faaosofia ai lagona o tagata e tulai ma tusi le aao foai.
O le auga tonu o lea po faapitoa e toe faamanatu pea tu ma aga a Samoa i tupulaga o le ekalesia. O le tamaitai o Akenese Aggie Lale o ia lea o le Peresitene o le autalavou. O le sui Peresitene o Noa Fau. O le Teutupe o Mary Tuiloma, Failautusi o Easter Iuli. Sa fai ma sui o le autalavou ma le ekalesia le susuga ia Pitoamoa Faamanu Lefua e faatautaia le po atoa.
O le aao foai o le atunuu sa taulimaina e le autalavou a Inala Uniting Church e tusa ma le valu afe ma le onosefulu tala ($8,060) ma o le a fesoasoani lea seleni i nisi o fuafuaga auā le alualu i luma o polokalame faagasolo a le autalavou. Sa momoli le agaga faafetai o le sui o le ekalesia i le paia ma le mamalu o Samoa sa paau atu ma opogi le faamoemoe.
Na toe saunoa faafetai le faafeagaiga ia Rev Tino Scanlan e faaali foi lona agaga fiafia i le matagofia o lea po.
Na malu puipuia itu e fa o le nofoaga sa fai ai le faamoemoe auā sa leoleoina e le au sikulaki sa taitaia e le alii pese lauiloa o Samoa o alaala i Brisbane le susuga ia Seiuli Pesa Ilimaleota faapea Faalafi Lale ma Tuifaaga‘e.
