Na faaautū mafaufauga o le sauniga, o tautalaga, o viiviiga i le sauniga lotu a le Aufaipese, i le faapaiaina lea o le togiga fou a le aufaipese Matagaluega Samoa Ekalesia Metotisi Niu Sila Birkenhead, North Shore “Ave Lou Leo ia Aogā” i luitau faaleagaga ma faamalosiau i le auaunaga faaleaufaipese, o le sauniga lotu amata o le Aso Sa na se‘i mavae atu i Birkenhead North Shore. Na vaaia le sagisagi fiafiaai o le Ekalesia aemaise lava i le Aufaipese i le sauniga faapitoa i le faapaiaina lea o le latou togiga fou.
Ma o se tasi lenei o galuega poo malumalu tapuai o loo mafuta ai nisi o tatou tagata i North Shore e oo mai i le taimi nei. Sa vaaia i lea taeao le tino matutua o alo ma fanau aemaise nisi sa valaaulia faapitoa mo lea sauniga tāua. O lenei sauniga sa taitaia lava e tamaitai faifeau Rev Suivaaia Te‘o, o le Matagaluega Samoa Ekalesia Metotisi Niu Sila Birkenhead.
Ina ua tulai le failautusi e fofogaina le tala o le galuega faaleaufaipese, na ia ta‘ua ai e faapea o le galuega faaleaufaipese na faavae mai i le tausaga 1978 ma ua atoa ai i le Aso Sa na se‘i mavae atu le 35 tausaga o le galuega faaleaufaipese. Sa maitauina pea le agaigai pea i luma le galuega, e ui o loo iai foi ni luitau i le galuega, ae faafetaia pea le fesoasoani mai o le agaga o le Atua e faamalosiau.
O le faitau aofai o le aufaipese i le taimi e to‘a 46, e 27 tamaitai, ae 17 alii, ma o loo tagi lava i luma le galuega faaleaufaipese i nai lafolafoga i vaiaso taitasi e faamāmā avega ai i aiga lotu. Sa tautino foi le Failautusi ia Sarai Meki e faapea, e anoanoai sauniga sa faaaogā i ai le auaunaga faaleaufaipese i lotu a le Matagaluega, o sauniga masani, faapea foi sauniga Faa-ekiumene ma isi Ekalesia Kerisiano Samoa i North Shore lava e pei o le Toeaina ia Fiatepa EFKS ma isi tapuaiga kerisiano eseese.
Sa taualugaina le Ripoti faaleaufaipese ina ua afea ma faailoa le laei tapuai a le Aufaipese i le latou togiga fou i lea taeao. Sa ia faafetai foi le lagolago a sui a Aufaipese uma i le galuega, ae o loo matala foi lava ma le avanoa e ulufale ai i le galuega faaleaufaipese e faaaogāina ai lou siufofoga e vivii ai mo le Alii; e leai se gataaga o le olaga faaleaufaipese se‘i vaganā lava ua lē toe iai se mānava o totoe.
O le Taitaipese o Tiumalu Brewster; o le Failautusi o Sarai Meki; o le Teutupe o Iulieta Logi; o le Faiaoga ma le Ta Piano o Fualau Meki & Malagaoma Kalolo. O se tasi o vaega matagofie o le sauniga o lea taeao, o le tulaga na lagi ma usuina ai viiga e vaega esesese o le Aufaipese e le vaega o le Soprano, le Alto, Tenor ma le Bass.
O se taeao o le agaga faafetai i mealofa ua auala eseese mai le Atua. Na taualugaina le sauniga i lea taeao i le folafolaina o le Upu Faauuina a le Atua mai lana Auauna, le Tamaitai Faifeau Rev Suivaaia Te‘o.
O upu faamalosiau, upu faalototele, o se sauniga ua faamauina nei i talafaasolopito o talaaga Faaleaufaipese a le Matagaluega Samoa Metotisi Niu Sila, ina ua aulia ma le agaga faafetai le aulia ai ma le manuia le 35 tausaga o le galuega i totonu o Birkenhead North Shore. Ina ua mae‘a le sauniga ona alo atu loa lea o le Ekalesia i se taumafaga ti o le taeao e faaauau ai le agaga fiafia ma le faafetai i le taeao.