O le susuga David Nomeneta Uaine

Ua mata leaga ma lē lelei le vaaia a atunuu ma Malo i fafo i le tulaga ta’uleleia o le atunuu ona o le solitulafono na faatau ai i ni tagata i fafo ni Tusifolau Samoa. 

O le molimau lea a le Pule Sili lagolago o loo vaaia le auaunaga tau femalagaa’iga a le Malo i le Matagaluega a le Palemia ma le Kapeneta.

O le lipoti i aafiaga o lea auaunaga a le Malo i le solitulafono na molia ai David Nomeneta Uaine sa galue i le ofisa o femalagaa’iga o loo faailoa ai foi e le faauluuluga o femalagaa’iga le susuga Siaopo Pese o lagona o tagata faigaluega o le ofisa na lagomia ona o faitioga a le atunuu ina ua aliali le solitulafono ma ua le sagatonu ai i nisi taimi mafaufau o le au faigaluega ao faatino le latou auaunaga ma le tautua. 

E le gata ina iai ia aafiaga i lagona o le au faigaluega, ae o le faatuatuaga o le atunuu i le tautua a le ofisa ua maualalo ma ua sola ai ma le tulaga talitonuina o le auaunaga. O aafiaga ia sa silasila iai le faamasinoga ina ua iloiloa lana faaiuga faasaga ia David Nomeneta na faamaonia ona moliaga e 28 i solitulafono o le faia o faamaumauga sese, saini faamalosi o pepa o faamaumauga, ma le tuuina atu o tusifolau i ni faiga faaalatua ma le le faamaoni.

O le Aso Faraile ua mavae na faatoa folasia ai le faaiuga a le tamaitai faamasino le afioga Tafaoimalo Leilani Tuala Warren i moliaga o David ina ua mae’a ona suesueina molimau a leoleo. 

O se tasi lenei o mataupu na toe lalaga mai ai mafaufau o le toatele e silafia le mataupu sa vavao ai lagona i ni tausaga ua mavae ona o tuua’iga na mapuna mai i le faatauina o Tusifolau Samoa i le ofisa o le Malo Samoa sa i Uosigitone.

Peitai o moliaga o David Nomeneta sa faatino lava i le ofisa o femalagaa’iga sa galue ai lea sa ia faaaogā fesootaiga i luga o masini komepiuta e faatino ai feuiuia’iga o le faia o Tusifolau na faatau i ni tagata. I faamaumauga a leoleo ma le faamasinoga o loo faaalia ai sa faatoese lē ua molia i le alii Pule Sili lagolago o loo iai le vaaiga o le ofisa o femalagaa’iga ona o lana gaioiga na faia.

E ui ina ogaoga solitulafono na faatino e David ae e iai vaega lelei o le taulealea sa silasila iai le faamasinoga e maua ai se faamama avega i lona faasalaga. O ia ose tagata amio lelei ma tausaafia i lona aiga ma lona nuu aemaise o lana ekalesia. O se tagata sa faatuatuaina e ona matua i soo se auaunaga faaleaiga.

O itu lelei ia aemaise o itu e ogaoga ai solitulafono sa ia faatino sa silasila ai le faamasinoga e amata lana fua mo se faasalaga i le ono tausaga, e ui sa finau lana loia e 3 ma le ‘afa tausaga ae o leoleo sa finau e amata i le fa tausaga. I vaega uma sa iloilo e le faamasinoga na toesea le lua tausaga ae totoe ai le 4 ua tuli nei o le faasalaga o lē ua molia. 

E faigata le alofa o mātua i fanau ma o le vaega lea sa molimauina ina ua mae’a ona lau le faasalaga o David, ona sa tutulu loifofoga o lona tina ona ua valavala le mafutaga faamatua aemaise o le lotoifale o le aiga.