O le saili malo o le tele o alo o Samoa i atunuu i fafo o se tulaga lea e sisi ai pea ma agiagia le tagavai a si o tatou Malo tutoatasi a o maimoa atunuu eseese o le lalolagi. E tele taleni ma agavaa na tuuina e le Atua i soo se tagata soifua ma e ao pea ona faaaoga auā o le meaalofa e le āumaua.
O le Aso Toonai na sei mavae atu nei, sa faia ai se taamilosaga i le va o au eseese sa tauva, ae filo ai ma le au matautia o loo faauluulu i se alo Samoa, le susuga ia Faalavelave Frank Frost, o loo vaaia pea le lagolago malosi i ai e le gata o Samoa ae sili ona faafiafiaina ai papalagi.
O se alo foi o Samoa e lauiloa tele i totonu o Kuiniselani i lea taaloga aemaise o le lelei o lona va ma tagata, ma e faigata tele ona iloa o ia o se Samoa ona e tai foliga o se tagata mai le konetineta o Asia, peitai e fiafia tele o ia e avea o se toto Samoa moni.
O se taaloga mataina auā e toatolu tamaiti o le kalapu a Frank Frost sa faamanuiaina i le pine auro e tasi ma pine siliva e lua. E aoga tele lea taaloga i le puipuiga lea o oe mai faalavelave ma taimi e osofaia ai e le fili a o faapea ona lava mea faigaluega e tetee atu ai. Ua faaigoa lava lea kalapu i le Frank Frost Taekwondo Australia.
O le tulai mai o se uluai alo o Samoa i lea foi faagatama e mimita ai le agaga ma faafiafiaina ai pea o tatou tagata i lenei itu.
O le susuga ia Frank Frost ua faasuafaina i le tofa iā Faalavelave, ma ua iloga lona tulai mai ma le tautaua i atunuu i fafo aemaise lava Ausetalia.
O ia o se faiaoga sinia i lea taaloga faapea foi le faatuina o lana ia lava kalapu ua faasuafaina i lona ia suafa (Frank Frost Taekwondo Australia) Na ta‘ua e Frank, o le taleni ua foaina e le Atua ia te ia, ua mafai ai ona faailoa lona fia tautua i lona atunuu o Samoa e pei ona fesoasoani malosi ai i le kalapu a le KL Taekwondo Samoa INC.
Ua atoa nei le luasefulu tausaga o faaauau pea le koleni mo le alu i luma mo nisi o ona faaailoga o loo ia tulimatai pea i ai.
O lona soifuaga mai lenei taaloga sa amata koleni mai o ia i Niu Sila i le tausaga 1998 e oo mai i le taimi nei.
Na amata ona fusu mai i le fusi samasama (yellow belt) seia maua le fusi uliuli (black belt) ma faamanuiaina ai o ia i faaailoga o talita poo ipu tetele atoa ai ma siamupini i Niu Sila ma Ausetalia.
O le mae‘a ai o le taaloga i le Aso Toonai na tea nei sa faaiuina ai i se pati tele a le kalapu, aiga, uo ma ē masani e faamanatuina ai le 51 tausaga o lona soifua i le aso 27 o Fepuari.
Sa faapea ona valaaulia ai foi le sui o a tatou talafou ma sa molimauina ai le tele o uo ma i latou e fiafia tele i uiga o lea alo o le atunuu aemaise le lelei o lana koleniina o alo mai isi atunuu.
E fiafia o ia e aoaoina alo ma fanau a Samoa i lea taaloga, e pei ona tālia ai foi le malaga mai Samoa i le masina fou, lea o le a ia talimalo ai faatasi ai ma le faletua ia May ma le nofoaalo.
O lea faiga malaga o alo e toasefulu o Samoa e fusu i le Taekwondo Queensland Open Championships 2010. O lana faafetai i le Matai i le lagi ona o le malosi o lona soifua ma le malamalama o le mafaufau, ua mafai ai ona faaaoga lana taleni e tautua ai
mo Samoa.
O le tofa a Faalavelave Puipui Frank Frost o ona alalafaga e lauiloa ai o ia i Samoa, o Samatau, Fasitoo, Lotofaga, Lepea ma Vaimoso.
