O le filifilia ma le valaaulia faapitoa o lea foi alo sailimalo o le atunuu i tulaga tau galuega a le malo e tauaveina le igoa o Ausetalia i le Atu Solomona, o se mitamitaga lea i aiga, uo faapea lana ekalesia i Southwest Brisbane ma le pulega EFKS a Saute aemaise nai ona tuaa.
O le tamaitai o Agnes Taimane Tuiai o se alo e faasino i le uluai toa o le galuega, o le uluai Toeaina foi o le Ekalesia EFKS i Brisbane, susuga i le Toeaina ia Rev Samuelu ma le faletua ia Tima Tu‘iai, ua penisiona mālōlō manumalo (Falefa ma le faletua ia Tima mai Vini Fou)
O nisi nei o toa ua iloga i talafaasolopito o le galuega i le Ekalesia EFKS i Brisbane nei sa o la asaina mai le gasū o le taeao, i le tau amataina o le galuega i le aai nei. Sa soifua a‘e ma a‘oa‘oina Agnes Taimane i Niu Sila, i le Sacred Heart Primary, St Marys College, ona malaga mai lea i Ausetalia nei ma toe faalauteleina ai tulaga tau a‘oa‘oga i iunivesite.
O isi o ona faailoga tāua ua ia tauaaoina nei ma ua faamanuiaina ai o ia i tulaga tau galuega e tautua ai i le malo o Ausetalia. 1991 – faauu i le Iunivesite o Kuiniselani (UQ) ST LUCIA, i lena faaailoga o le Bachelor of Economics. 1999 – faauu i le (Queensland University of Technology – QUT), ma tauaaoina le faailoga, Bachelor of Business, Majoring in Accounting.
2000 – galue mo Kuiniselani o se suetusi. O le 2006 sa sainia ai se konekarate i le R.A.M.S.I. (Regional Assitance Mission to Solomon) Auditor General’s Office e galue ai i totonu o le ofisa autū i Solomona.
O le iai o ia i totonu o lana galuega lea na ia fetaui ai i se tasi ua ia filifilia e avea ma ana paaga poo lana manamea le alii o Francis Aruwafu, (Eco-Tourism Owner/Operator mai Malaita Province, Atu Solomona). Sa galue foi lenei alii i le ofisa malaga, le Solomon Airlines e avea ma sui o Solomona i le World Cup soccer.
O le aso 21 o Me sa tuufaatasia ai o ia ma lana manamea e ala i le faaipoipoga, ma sa taitaia le sauniga e le faafeagaiga o le Uniting Church ae faaiu i se faamanuiaga sa faia lea e le susuga i le toeaina Penisiona Rev Elder Samuelu (tuaa o le tamaitai faaipoipo).
Uosili tamaitai – Kerryn Kwan (tamaitai loia e alaala i Samoa sa faapea foi ona galue i Solomona i le RAMSI o ia ose uomamae ia Agnes. Uosili alii – Francis Kelesi (faipisinisi e alala i Honiara). Aumea mamae tamaitai – Tima ma Taimane Mataafa malaga atu i Brisbane (o alo o le toeaina taitai Pulega EFKS, Rev Tauaaga ma le faletua ia Reeta Mataafa). Aumea mamae alii – Petaia Leavai (Aoao mai Malua) & Iosefa Sotoa (Sikolasipi i Fiti) o tausoga ia o Agnes. Ave mama – Samuelu Mataafa, o le nephew faapelepele o le tamaitai faaipoipo.
O le faanaunauga foi lea o le tamaitai, ua faatumuina ai o ia i le fiafia ona ua molimauina e nai ona tuaa ma aiga lona aso faapitoa aemaise o faamanuiaga.
O le vaiaso ua tuanai na faato‘ā taliu mai ai le susuga i le Toeaina Penisiona mālōlō manumalo, Rev Samuelu ma Tima Tu‘iai, faapea le faletua o le Toeaina Taitai o le pulega EFKS a Saute o Rev Tauaaga, le faletua ia Reeta Mataafa ma le nofoaalo ma le tele o aiga na malaga e lē gata o Brisbane nei, Sini faapea aiga na malaga ane i Samoa.
O le tausaga ua mavae i le masina o Tesema na malaga mamao mai ai lenei tamaitai i le faamanatuina o le 50 tausaga talu ona mafuta nai ona tuaa e ala I le faaipoipoga, ma na matuai maofa le susuga i le Toeaina penisiona mālōlō ma le faletua i le maoae o tapenaga na faaofo ai i laua e si a la tama le tamaitai o Taimane Agnes.
O le itu na faateia ai le susuga i le Toeaina ia Samuelu ma Tima Tu‘iai, ona o le anoanoai o faamanuiaga a tagata taualoa o le malo o Ausetalia e tauala mai i le tamaitai o Agnes faapea le faamanuiaga mai le tamaitai Palemia o Ausetalia, Julia Gillard.
E ui lava ina nofo lenei tamaitai i atunuu mamao peitai e lē o mapu lana tausi i nai ona mātua ma le aiga e ala i le lagolago malosi mai i soo se vaega.
O le masina o Iuni o le tausaga nei o le a faamae‘a ai lana konekarate i Solomona ona toe taliu mai lea ma galue i Canberra mo le malo o Ausetalia o ia o se Senior Audit Advisor, o se fiafiaga sili lea i aiga ona o le a toe maua se fesootaiga latalata ma Agnes, o ia o le uii o le aiga.
