“Faigata ona ou talanoa i le suesuega”…Aumua Ming Leung Wai
O loo faagasolo se suesuega o loo faatautaia e le Loia Sili a le Malo ma lona ofisa e sailia ai pe o ni tupe eleelea sa aumai i Samoa na faatino ai le faatauina o ni fanua umia saoloto ua iai ma ni fale e faitau miliona o latou tau, lea sa taulamua ai se Minisita o vaomatua o le Malo o Papua Niu Kini le alii o Belden Namah (silasila i le ata).
O lea Minisita e faapea ni molimau e lei faamaonia e mau paolo i se tamaitai Samoa.
O le masua mai i fafo o faatauga fanua ma fale a lea tagatanuu o Papua Niu Kini, na ave ai se fautuaga a le Kovana o le Faletupe tutotonu, le susuga Leasi Papalii Tommy Scanlan, i le Loia Sili le afioga Aumua Ming Leung Wai, mo le faia o se suesuega.
O le naunautaiga o le Kovana o le Faletupe tutotonu ia saili pe le o aafia ai ni faiga solitulafono i le aumai o ia tupe tetele i le atunuu e faatino ai ni fefaatauaiga.
O le faanaunautaiga foi o le pulega o le kovana ia faatumau le tulaga aloaia ma le amiotonu o faiga tau pisinisi i Samoa e aunoa ma le aafia i ni faiga solitulafono e aafia ai tupe eleelea poo money laundering.
O nisi o fanua ma fale umia saoloto o loo i se vaega o le taulaga o Apia faapea nisi o pitonuu tau lalata i le taulaga o Apia, sa faatauina e le alii Minisita o Belden ma lona toalua.
O nisi fale ma fanua ua maea ona totogi uma le tau, a o nisi e lei maea ae ua na o ni vaega ua faamatuu ia i latou e ana ia meatotino.
E lei mafai e le Loia Sili a le Malo ona aumai sona finagalo ina ua fesiligia i le tulaga o le latou suesuega, ona o loo faia i se tulaga faalilolilo.
“E le mafai ona ou talanoa atu i le suesuega”, na pau lea o le finagalo le Loia Sili na aumai e tusa o le faatalauula a le tusitala. O loo teena e le alii Minisita o Belden ina ua fesiligia e le Itu agai a le Palemene o le latou atunuu, ana faatauga fanua ma fale i Samoa.
Ua ia tautino e faapea e le o tusia ia meatotino i lona suafa ma o le a ia tuuina atu ni faamaoniga i le Palemene e saga faamaonia ai.
O lea alii minisita o se tagata faipisinisi o loo ia umia le tele o sea o se kamupani a le itumalo faafaipule o loo tulai mai ai, o le taina lea o le laau failaupapa mai vaomatua ma faatau i fafo.
O se pisinisi e tele tupe e maua ai, ma o lana faamalamalamaga foi lea ina ua fesiligia e faipule o le Itu agai.
I Samoa e silia i le $2 miliona le tau o le fanua o le kamupani o Chan Chui Company Ltd i Taufusi ua ia faatauina.
O se fale fogafale lua fou ma le fanua i Papaloloa e tusa lona tau ma le $1.48 miliona ma se fanua i Vaitele e $1.8 miliona.
O loo iai foi molimau e faapea sa iai se kamupani faaune tupe a lea alii na faagaioia i se nofoaga i le taulaga peitai ua tapunia.
E lei manuia sailiga a le tusitala mo le fia iloa tonu poo ai na faagaioia lea pisinisi faaune tupe (Loan finance company), ae ua faaalia e ni molimau sa tumutumu le kamupani i le toatele o le atunuu na lolofi i ai mo le fia maua o ni nonogatupe.
E le o iloa le umi o suesuega a le Loia Sili ma lona ofisa, ae o le a faailoa mai i le tusitala e le Loia Sili le taunuuga o ana suesuega pe a maea.
