“Ioe o loo agai suesuega i le alii leoleo sinia”
Leaupepe Fatu Pula
Ua lē muta pea faaletonu e taia ai le auaunaga tāua o loo feagai ma le Matagaluega o Leoleo ma Falepuipui i Samoa, ona o faafitauli o loo tuuaia ai pea lea tautua tāua a le Malo. Talu ai nei na aliae mai ai tuuaiga i nisi o pagota ua aitalafu e leoleo a latou seleni, ae ua lē totogia.
O isi tuuaiga ua faaaogā e leoleo o le falepuipui meaai a pagota, ma le tuua’iga ua laumanu’ia ai le igoa o se alii leoleo sinia e faapea o ia ua ma‘ito ai se tamaitai o loo nofosala.
“O loo faia suesuega i le mataupu lena ma e atagia mai i faamatalaga ua mae‘a ona faamauina, o le leoleo sinia sa galue i le falepuipui o loo tuuaia i le ma‘itaga o le tamaitai”. “Ioe o loo agai suesuega i le alii leoleo sinia”.
O le finagalo faaalia lea o le Komesina Lagolago o loo avea ma sooupu le afioga Leaupepe Fatu Pula ina ua faafesagai ma le tusitala ma faatalanoa e tusa ai o faitioga ma tuuaiga o loo aliae mai i totonu o le falepuipui i Tafaigata.
O loo iai nisi o molimau e lē o manao le sui komesina na te faamaonia, e pei ona ta‘ua i ia molimau e faapea o le tamaitai pagota na aafia i le ma‘itaga sa nofo i le fale sa faamautu ai le leoleo sinia i totonu o le lotoa a le falepuipui. “E faigata ona fai atu sa‘u faamatalaga i le itu lena ona o lea e lei mae‘a le suesuega”, na saunoa ai Leaupepe.
O loo iai foi nisi molimau e lei faamaonia e faapea o le faapa‘ūina o le ma‘itaga o le tamaitai pagota o se gaioiga na fafau e se isi leoleo e vavalalata ona sootaga ma se tamaitai pagota e iai sona silafia i le faatinoina o lea tulaga.
O loo loma nei le faamasinoga o se tamaitai sa avea ma tausi soifua ae sa faasalaina i le falepuipui ona o le solitulafono o le faapa‘ū o ma‘itaga o tamaitai.
O le sui lea ua toe molia foi ona o le faapa‘ūina o le ma‘itaga o le tamaitai pagota o loo laumanuia ai le leoleo sinia o loo agai iai suesuega. O se taimi o le masina nei e suesueina ai le moliaga o lea tamaitai i le Faamasinoga Maualuga.
O aitalafu tupe a leoleo o le falepuipui i pagota ma le faaaogā e nisi o leoleo o meaai a pagota na faaalia e le Komesina Lagolago o se gaioiga ua masani ai lava le soifua o le falepuipui i le va o pagota ma leoleo.
“E aitalafu tupe foi pagota latou i leoleo, ma e tufa foi i ai e leoleo a latou meaai i pagota ma e foliga mai i faamatalaga ua tuuina mai i le suesuega o se culture ua masani ai totonu o le falepuipui”.f O le saunoaga lea a Leaupepe ma ia faapea mai o se vaaiga lea i le ola fesailia‘i i le va o leoleo ma pagota faapea pagota i leoleo. E manatu le Komesina Lagolago e lē o se faiga faapiopio poo se corruption auā o lona talitonuga e faapea lava le soifuaga o loo soifua ai nisi o le atunuu i nuu ma afioaga. O le a tālia nei se taunuuga o le suesuega i ia tuuaiga.
