O nai tausaga e lei mamao tele atu sa osofai ai e leoleo ni nofoaga sa faia ai ni pisinisi ma fale o ni tagata sa masalomia i lo latou umia o laau ma pauta faasāina e pei o le maruana, le cocaine ma le aisa. Sa faia suesuega ma molia ai nisi peitai e toatasi lava le tagata na faaauau ona moliaga o le pauta faasāina o le aisa, lea na faamaonia ma faalepuipui ai o le susuga Joe Palagi.
O isi sa molia i le umia o le aisa na toe faaui i tua o latou moliaga ina ua ave pauta na maua i fafo mo suesuega ae maua ane e lē o ni aisa ae o pauta faaiila ai nifo auro, o isi pauta o le fefete fai meaai ma le falaoamata.
Ua toe aliali mai foi la foliga o le pauta faasāina o le aisa le methephataminne, ina ua faia se osofaiga a leoleo i se fale o se aiga i Faleula ma maua ai laau faasāina o le maruana.
Na toe osofai le nofoaga o le pisinisi i Pesega a se alii mai le aiga lava i Faleula lea na osofai e leoleo ma maua ai ni pauta ua talitonu leoleo o le aisa. O loo iai foi masalosaloga sa gaosi ai le pauta faasāina i le nofoaga o le pisinisi i Pesega.
E toatasi se alii na taofia ae oo mai i le faaiuga o le vaiaso na tea nei, ua iai se isi taulealea ua taofia e leoleo mo suesuega, ae e lei faia ni moliaga e pei ona faailoa mai e le sui sooupu le afioga i le Komesina lagolago, Leaupepe Lealaitagomoa Fatu Pula.
“O lea ua aumai le isi alii mo suesuega ma o loo masalomia e iai lona sootaga i le gaioiga lea na faia i le pisinisi e faapea sa gaosi ai le aisa”.
O le faamatalaga lea a Leaupepe ae na ia faaalia foi e lē o nofoai leoleo i le sailia pea o faamatalaga e fesootai ma lea gaioiga, ona e iai ni tagata mau galuega lelei o loo masalomia ai aemaise o ni tagata e fai a latou pisinisi.
O aafiaga o tagata nei na ta‘ua e leoleo, e mafua ona o le faatauina auā e tele tupe e maua ai. O loo ta‘ua e se molimau e lei faamaonia e faapea, ua faailoa uma e le taulealea na taofia muamua i le osofaiga suafa o tagata e iai lo latou piitaga i laau ma pauta faasāina ua maua e leoleo.
E lei faailoaina mai e le sui sooupu pe fia le mamafa o le pauta o le aisa na maua faapea le maruana. O suesuega o loo faia e leoleo o loo silasila ai pe faapefea ona ulufale i Samoa le pauta faasāina, ae pe sa faapefea foi ona faaulufale i le atunuu ae o ai foi tagata sa aafia ai i lea gaioiga.