Masalomia ni tagata faipisinisi i pauta o le ‘aisa

O suesuega a leoleo i se pusaoloa mai Amerika a se tagata faipisinisi na aumai ai ma se vaega o le pauta faasāina o le ‘aisa, ua faaalia e se molimau mai leoleo ua iai se isi faipisinisi ua masalomia ai foi.
O le Aso Lua na tea nei 23 o Aperila 2013 na maua ai e alii ofisa o le tiute le pauta faasāina o nanā i totonu o ni taumafa na aumai i le pusaoloa e 20 futu lona umi.
Na faamatala se molimau faatuatuaina i le tusitala, e fai le galuega lea a alii ofisa o loo iai ma le alii faipisinisi e ana le pusaoloa.
Na maua foi pauta o loo iai lava le faipisinisi, ma faapea ona ave ai se vaega o le pauta ua test pe sue i se masini a le ofisa o le tiute. Na mae‘a lea gaioiga ona logo ai lea o leoleo ma faataalise atu loa i le uafu i Apia.
Na ave ai lava e leoleo i le aso lea le alii faipisinisi (taofia lona suafa) mo suesuega atili, ma ua faailoa mai e se molimau mai leoleo, ua molia le alii faipisinisi i moliaga o le faaulufale mai i le atunuu faasolitulafono o pauta faasāina, faapea lona umia o pauta faasāina.
E tuuina atu lenei lipoti mo le faasalalauina e lei maua mai lava se faamatalaga aloaia mai leoleo i le tulaga ua oo i ai suesuega, ae o le tala a le molimau mai leoleo, o lē ua molia ma taofia nei o se tasi lava e silafia e le toatele o le aufaipisinisi ma o se tagata talavou foi.
O loo iai la se tasi o pisinisi o loo agai i ai suesuega e ese mai le pisinisi a lea alii ua molia, ona e faapea ni molimau e lei mafai ona faamaonia e iai foi lona sootaga i le pauta na aumai.
O le tulai mai o lea gaioiga solitulafono sa taofia ai e le ofisa o le tiute nisi o pusaoloa na aumai Amerika faatasi ma le pusaoloa na maua i ai pauta faasāina.
O se gaioiga sa faia ina ia faatino ai se sailiiliga ina ia mautinoa e lē o aafia ai se isi pusaoloa, peitai ina ua mae‘a ona sailiga sa faapea ona tiute ia pusaoloa ma ave loa i tua i le aoauli o le Aso Lulu na sosoo ai, le aso 24 lea o Aperila.
O loo tele tala salatua i le iai o masalosaloga i le faaaogā o pusaoloa o loo aumai ai oloa faapea nisi ituaiga o oloa mai fafo e nanā mai ai ma pauta ma laau faasāina.
O loo tele foi tala salalau solo i le taulaga o loo laumanuia ai ni suafa o ni tagata faipisinisi o loo fesootai a latou faiga faapisinisi ma le aumai i le atunuu o pauta faasāina. E lē o iloa poo afea e tulai ai le alii faipisinisi ua molia.