O loo tuufesilisili pea nisi pe aisea ua toe liliu ai finagalo o alii ma faipule o le afioaga o Tiavea i Aleipata ma fulitua mai i fuafuaga a le malo ua leva tausaga o faatalanoa i le faatuina lea o se malaevaalele i Tiavea. E lē o se tamai liliu foi o finagalo ua matuā fulitua mai lava i fuafuaga na faatalanoa.
O le faamoemoe i le faatuina o le malaevaalele ina ia mafai ona faaaogā i taimi o faalavelave faafuasei. E lē gata i lea o le latalata i Amerika Samoa e aogā mo femalagaa’iga vavave ma ituaiga malaga pupuu e pei o malaga faapisinisi.
E lē gata lea o le silasila mamao a le malo i le isi 50 tausaga o lumanai nei, pe a fai ae sologa lelei fuafuaga e faaono avea lea vaega o le atunuu i Tiavea e tapuvaetasi uma iai pisinisi i lea faaitu o Upolu.
I se faatalanoaga ma le minisita o Galuega ma Atinae Tetele, na ia saunoa ai o le taimi nei e lē o mautinoa pe faaauau lea atinae pe leai e pei ona fuafua iai le malo e faatino.
“O le isi lena atinae a le malo, ua tulai mai ai foi issues mai le nuu, o le amataga lava ina ua uluai faatalanoa le mataupu na malilie uma peitai ina ua agai atu le malo o le a tapena lona faatinoga, ae o ane le nuu ma poloka, ua eseese manatu o nisi o matai o le nuu, fai mai e lē tatau ona aumai o latou fanua e fausia ai le malaevaalele.”
“Ae pei foi ona silafia o taimi uma lava e feiloai ai ma le nuu ma faatalanoa e faatino le tu ma aga e masani ai, e pei o le ave iai o seleni, a lea ua alu alu a, toe sui mai, o le vaiaso na tea nei na pasia ai e le Kapeneta le konekarate a le kamupani latou te suaina le malaevaalele, ae agai atu i tua le konekarate, ae toe omai le nuu ma faalavelave i le pulega o malaevaalele e taofi le galuega.”
“O lea la ua taatia ai foi lea atinae se’i iai se taimi.” Na saunoa le minisita o mataupu e pei ona ia ta’ua, o fanua faaleaganuu o le a aafia i fuafuaga o le atinae.”
“Sa lelei a matou faatalanoaga na fai, ma ua malilie foi iai, peitai na tulai mai loa le vaega lea o loo vevesi nei i fanua, le SSIG, ua ou lē iloa poo le ā le latou fagogo ua fai, ua ala ai ona suia mafaufau o alii ma faipule o le afioaga.”
“Ae o le mafaufau lava ia a le malo, e aogā le malaevaalele mo faalavelave faafuasei, tai pei o se matagi malosi faafuasei, lona uiga e tatau ona afe i le malaevaalele lea, ina ne’i afaina pe a fai e faaauau mai pea i le malaevaalele i Fagalii.”
Na fesiligia le afioga i le minisita pe na manino se tau na ofo e le malo mo le nuu ina ua faatalanoaina le mataupu i le amataga. “E leai ni fuainumera na faatalanoaina, o le tuutuuga na fai ma se tasi o matai o le nuu, Tuiavii, o le ā lava le fesoasoani e avatu e le malo, o lena lava, ae faatino le galuega.”
O se tasi o matai o le auaiga o le au Auvaa i Tiavea, Lealailepule Koria Auvaa na ia fesiligia le malo, pe na faatino muamua ni suesuega i aafiaga e faaono aafia ai tagata o le nuu aemaise ona tuaoi. “O la’u talosaga i le malo afai na fai ni suesuega muamua, e tatau la ona faailoa i le nuu mo lo latou silafia, aafiaga tau soifua maloloina, ma aafiaga tau i le siosiomaga, o ituaiga lipoti ia o loo matou fia iloa.”
Ae na saunoa le minisita na faatino suesuega muamua ma o le mafuaaga foi lena o le fuafuaina o le atinae.
O le faanoanoaga o le minisita, ona e tele avanoa faigaluega e faamanuiaina ai le afioaga pe a faatino le atinae.
E lē o mautinoa i le taimi nei pe faaauau pe ua leai foi.
