Masalomia le pisinisi a le faipule, pusaoloa fagu whiskey

Ua masalomia nei le iai o se aafiaga o le pisinisi a se tasi o faipule o le Palemene o loo lagolagoina le vaega faaupufai o le Tautua Samoa, le tofa Levaopolo Talatonu Vaai, i le aumaia i Samoa o se pusaoloa o pusa poo katuni o fagu malolosi o le ituaiga o le whiskey, lea na faaalia e leoleo ua molia ai se tina 30 ma ona tupu tausaga o lona matua.
O lea tina e faigaluega i le pisinisi a le alii faipule o loo i Vaimoso, ma o se pisinisi na te faaulufale i le atunuu oloa eseese mai fafo e aofia ai ma faamomoli ma uta.
E lei maua e le tusitala le faipule mo sona finagalo, ae ua faaalia e leoleo o loo faia pea a latou suesuega. E le o mafai e leoleo ona faailoa le suafa o le tina ua molia ae o loo faigaluega pea i le taimi nei i le kamupani lau uta mai fafo a le sui faipule.
Faaalia e le sooupu o le matagaluega o leoleo le tofa Fauono Talalelei Tapu, o le aso 16 o Aperila e valaau ai moliaga e lua o le tina talavou ua molia. O ia moliaga e aofia ai ni faiga tau faasese (forgery) ma le tuuina atu o ni faamaumauga lē sa‘o.
O se faasalalauga mai le pulega o le matagaluega o tupe maua o loo aofia ai ma le ofisa o le tiute, ua ta‘ua ai o lea pusaoloa na aumaia ai le 918 o katuni poo cartons o le whiskey, ae e leai se laisene e faataga ai ona aumaia e le tagata e ana le pusaoloa lea uta o le ava malosi.
O le tau atoa o le tiute ma lafoga e tatau ona totogi e silia i le luaselau afe tala. Faaalia e Fauono o suesuega a leoleo ua molia ai le tina, ae e lei maua atu se taunuuga o suesuega faalotoifale a le ofisa o le tiute lea sa suesue ai ma le aufaigaluega pe iai so latou aafiaga i le faaulufaleina i le atunuu o lea pusaoloa o fagu malolosi.
E faatoa maua le suafa o le tina ua molia, faapea lona nuu pe a tulai i le faamasinoga e pei ona faailoa mai e leoleo. O se lipoti i le lua vaiaso ua mavae na faaalia ai e Levaopolo Talatonu i se tasi o nusipepa, ua mae‘a ona faia ana sailiiliga e leai se aafiaga o lana pisinisi, peitai o lea ua faamaonia e se molimau o lana pisinisi e faigaluega ai le tamaitai ua molia e leoleo.
E iai nisi tagata e ono molia pe a mae‘a suesuega e pei ona faailoa mai e le sooupu o le matagaluega o leoleo ma falepuipui.