Ua faailoa i se tusi a le alii Palemia, Tuilaepa Lupesoliai Sailele Malielegaoi, i le faalapotopotoga o loo avea ma faamalu o faalapotopotoga tumaoti uma i le atunuu le SUNGO, lona fesiligia o le tulaga o loo faafoe ai le faalapotopotoga i le itu i le ofoina atu o fesoasoani mo ona sui auai.
Tusi a le palemia na tali atu ai i se tusi mai le SUNGO
Faaalia e Tuilaepa o lana silasila i le faalapotopotoga, ua le mulimulitai i ana taiala ae ua tausolomua le Peresitene ma le Pule Sili poo le CEO, i le faalauiloa o o la tagata ae le o faataua fuafuaga na faatu ai le SUNGO.
Na taua e le Palemia e lei faapea isi pulega na muamua atu auā sa maua lava a latou feiloaiga tausaafia faifai pea ma ia o
le minisita o faalapotopotoga tumaoti poo NGOs.
Faaalia foi e le Palemia ua avea le iai o le SUNGO ua tele ai ma le mau faafitauli ma tuai ai ona maua fesoasoani semanu ua leva ona maua pe ana faiupu lava le faalapotopotoga tumaoti ia ma i latou e maua mai ai ni fesoasoani e aunoa ma le toe faalavelave i ai o le SUNGO.
Sa taumafai atu i le tamaitai Pule Sili o le faamalu o faalapotopotoga tumaoti le faletua o Roina Vavatau mo se faamatalaga, peitai sa le talanoa mai. Ua fautuaina e le palemia le Pule Sili ma le Peresitene ina ia toe sasaa le fafao i le amio pe afai e toe fia faalelei le va o le SUNGO ma le Malo lea ua matua masofa lava.
O le tusi a le alii Palemia na ave i faauluuluga o le SUNGO:
27 Oketopa 2009
Peresitene o le SUNGO
Faafetai tele i lau tou tusi mai o le aso 9 Oketopa 2009
O la‘u vaai i sui o lau tou Komiti i le taimi nei – na o le pau lava le mea o loo mamafa i ai le pulega, o le faailoa ma faalauiloa ma faasalalau faalauaitele o outou lava tagata ma o outou lava foliga ae le o faataua au tou fuafuaga e pei ona faatuina ai lau tou faalapotopotoga. Lona uiga ua tele naua le fia iloa.
O le vaivaiga lea o loo gasegase ai tele lau afioga i le Peresitene ma le CEO, aemaise lava o le lua palalasi faatasi ai i le faalapotopotoga e tasi e matua le toe gafatia e nisi le lua uilua – e te lua mamafa tele. Ua leai ni au lua paga e taofi iumaea.
Sa le faapea i isi pulega na muamua atu. Sa mafai ona maua feiloaiga tausaafia faifai pea – ma le constructive ma a‘u nei o le Minisita o NGOs – na faigofie ai ona tuu atu fale o le Malo tou te faaaogaina sa isi i le va feloai ma le tausaafia. I le taimi nei, i le va tapuia a outou ma isi faalapotopotoga o loo avea ma sui auai i le SUNGO, ua atagia ai foi le lava le agaga fetuiai.
O loo tele foi le taimi alu i le finauvale i mataupu le faavaea ona taofi ai lea o fesoasoani sa tatau ona ave sao i faalapotopotoga.
Lona uiga ua avea nei le iai o le tou faalapotopotoga o le SUNGP ua tele ai le mau faafitauli – ma tuai ai ona maua fesoasoani semanu ua leva ona maua pe ana deal sa‘o le faalapotopotoga ia ma le donor, e aunoa ma le tou toe faalavelave i ai.
Ou te matauina ai o loo tou fesoasoani e taofi fesoasoani e ave i nisi o NGOs ae faavae i luga o uiga faaletagata e mafi ai tele lau susuga i le CEO ma le Peresitene o loo iai nei.
Sa le faapea uiga o isi na iai muamua.
Ai ona ua tele naunau o le lua popoto ma le lua maualuluga tele. Lea la ua lua pulea le SUNGO ma ua lua maua le lua avanoa e faatino ai lua uiga ua atagia ai oulua vaavaa ou te fautua atu ia matua toe sasaa le fafao i le amio pe afai e toe fia faalelei lo tatou va ua matua masofa lava.
O le tusi atu lea ma le alofa tele i NGOs ua mao i le SUNGO
Tuilaepa Lupesoliai Sa‘ilele Malielegaoi
PALEMIA
